Vote chhiar turin inpeih a ni tawh

Kumin Lok Sabha inthlanpuia vote tlate chu June 4, 2024 khian India ram pumah chhiar a ni dawn. Mizoramah chuan zing dar 8 aṭangin vote chhiar a ni dawn a, vote chhiar turin an inpeih tawh. Vote tlate chu round 2-5 chhunga chhiar zawh tura ruahman a ni.

Mizoram Election thuchhuah chuan, vote chhiar turin Mizoram a inpeih thu a tarlang a, "Vote chhiarna hmun tur counting hall-te chu Election Commission of India thupek angin vote chhiar hma ni thumah buatsaih fel vek tur a ni a, hengte hi district hrang hrangah peih vek tawh a ni," a ti.

Vote chhiar tura mawh­phurh­na hrang hrang neite’n training an nei zo tawh a; vote chhiar­naah hian returning officer, assis­tant returning officer, coun­­ting supervisor, counting assistant, micro-observer leh hna pawimawh dang hrang hrang thawktu mi 2,000 vel an awm dawn. Venhimna lam thawktute'n counting centre tinah thuah thumin venhim hna an thawk ang. Vote chhiar lai hi candidate, election agent leh counting agent-te’n a hmunah an en thei dawn a ni.

Mizoram pumah vote chhiar­na hmun (counting centre) 13 ruahman a ni a, Aizawl district-ah pathum awmin, district dang zawngah pakhat ṭheuh a awm dawn. Counting centre 13-ah hian counting hall 40 a awm dawn a, counting table 379 awmin, vote chhiarna dawhkan tinah counting super­visor pakhat, counting assistant pakhat leh micro-obser­ver pakhat zel an awm dawn. Vote chhiarna hmun hi ECI ruat observer-te'n an vil bawk ang.

Counting table awm zat leh counting station awm zat hian chhiar hun (round) a hril dawn a; round ngaa chhiar zawh tur Assembly constituency panga, round lia chhiar zawh tur consti­tuency 15, round thuma chhiar zawh tur constituency 18 leh round hniha chhiar zawh tur constituency pahnih a awm.

Zing dar 8 aṭangin vote chhiar ṭan tur a ni a, Aizawlah chuan postal ballot chhiara bul ṭan tur niin, postal ballot chhiar ṭan a nih aṭanga minute 30 hnuah electronic voting machine (EVM)-a vote tlate chhiar zui a ni ang. Aizawlah postal ballot bik buaipui turin ARO 20, micro observer 20 leh counting staff 60 an awm dawn.

EVM-a vote tla chhiar zawh vek hnuah constituency tina polling station pangaa VVPAT-a vote tla (paper slip)-te chu EVM -a vote tlate nen a inmil em tih finfiah zel tur a ni a, VVPAT chhiarturte hi pawhfuh hmanga thlan tur a ni.

VVPAT-a vote tla chhiar (man­da­tory verification) hi inthlan­pui hmasaah khan consti­tuency tina VVPAT pakhat zelah neih a ni a, kumin inthlanpuiah hian constituency tinah VVPAT panga zel chhiar tel tawh tur a nih dawn avang leh VVPAT-te chu a ruala chhiar loa a indawta chhiar tur a nih avangin vote chhiar hun chhung pawh a rei phah hret tura ngaih a ni.

Rang leh felfai taka mipui hnena result puan a nih theih nan counting centre tinah media centre dah a ni a, vote chhiar result-te rang leh felfai zawka lak khawm a, mipui hriat tura puanzar zung zung a nih theih nan CEO Office chuan Old Secretariat Building I-ah State Control Room a siam. State Control Room hnuaiah hian Communication Control Room leh Media Monitoring Control Room-te siam a ni bawk.