Damdawi-in pathum tan x-ray khâwl pe

Adviser to chief minister Lalmuanpuia Punte, MLA chuan June 1, Inrinni khan a pisaah a bial chhunga damdawi-in pathum - Biate Community Health Centre, East Lungdar Primary Health Centre leh North Vanlaiphai Primary Health Centre hnenah x-ray kháwl a hlan.

Lalmuanpuia Punte chuan, MLA fund hmanna tura a ngaih pawimawh ber chu vantlangin a huhoa an chhawr theih thil atana hman a nih thu a sawi a, "Zirna leh hriselna hi ka ngai pawimawh a, vantlang hriselna a ṭhat loh chuan vantlang nun a hlim thei lo. Zirna a ṭhat loh chuan ramin hma a sawn thei lo. Hengte hi ngaih pawimawh zual ka tum," a ti.

Hrangturzo bialtu MLA sawi danin, Biate damdawi-ina x-ray khawl chu a rei tawh a, N Vanlai­phai damdawi-ina mi pawh kum 2016-ah a chhia a; MLA fund hmangin a lei theih tih a hriat hnuin MLA fund hlui, la hman zawh loh hmang­in an lei a ni. X-ray khawl pakhat atan a leina leh a bunna atana cheng nuai 6 vel hman a ni ang.

Khawl hlanna hun hmanpui tu ZPM president Lalliansawta chuan, Hrangturzo bial mipui a lawmpui thu a sawi a, "MLA LADS fund hi ṭangkai zawka hman chhoh zel a ni a, van­tlangin an chhawr tlan theih tur thil atana hman hi a lawmawm leh zual, heti lamah hian kan inela kan incho phûr tawn zel ka duh hle a ni," a ti.