2020-21 session pawhsei a ni October 16 aṭangin pawl 10&12 Zirlaite'n sikul an kai ṭan dawn
School Education minister Lalchhandama Ralte hoa nimina Consultative Committee ṭhukhawm chuan, board exam tur pawl 10 leh 12 zirlaite chu October 16, 2020 (Zirtawpni) aṭangin regular class kaltir ṭan an rél a; school academic session chu pawhsei an rél bawk.
Lalchhandama Ralte chuan, Covid-19 avangin thla ruk leh a chanve vel dan pangngaiin sikul kal a nih tawh loh thu sawiin, "Hetih chhung hian Education department chuan zirlaite an awm âwl loh nan an tih tur thil tam tak a lo buatsaih tawh. Academic year kal zelah kum khat hloh a, kuangkuaha awm ringawt theih a ni lo," a ti.
School Education Minister sawi danin, Ministry of Home Affairs-in order a chhuah tawh angin, October 15 hnu lamah chuan state sorkarte'n Covid-19 boruak leh dinhmun thlir chungin ruahmanna siam a phal a; chuvang chuan nimina ṭhutkhawm hi koh a ni.
Ṭhutkhawma an rêl dan chuan, kum 2020-21 academic session March 2021-a tàwp tur chu April 2021 thleng pawhsei a ni. Chawlh awm loin 2021-22 academic session chhunzawm nghal a ni ang. Hei hi zirlaite'n an course a tam thei ang ber an zir theihna atana tih a ni.
Pawl 10 leh 12-te chu board exam tur an nih avangin tun kar Zirtawpni, October 16 aṭangin a pangngaiin sikul kal tur a ni a; pawl 9 leh 11-te erawh tuna kalpui mek angin, anmahni duh thuin sikulah zirtirtute zawh duh an neihte an zâwt chhunzawm thei ang.
High school leh higher secondary school zirlaite chu an duh chuan hostel-a awm phalsak an ni tawh a, mahse, Covid-19 lakah an fihlîm ngei a ni tih finfiahna an neih a ngai thung.
Pawl 1-8 zirlaite chu sikul la kal lo tura tih an ni a; HSLC leh HSSLC-te dinhmun a zirin, sikul an kal hun tur chu November thla laihâwl vela ngaihtuah leh tura dah a ni.
Consultative Committee-ah hian Human Resources Development vice chairman L Thangmawia, chief secretary Lalnunmawia Chuango, School Education department hotute bakah, Mizoram Kohhran Hruaitu Committee, Central YMA, MZP, MZU, private school leh zirtirtu pawl aiawhte pawh an tel a ni.
Mizorama sikul kal dan tur
• 2020-21 academic session chu April 2021 thleng pawhsei a ni.
• Chawlh awm loin 2021-22 session chhunzawm nghal tur.
• Class X & XII-te October 16, 2020 (Zirtawpni) aṭangin sikul kal ṭan tur.
• Class IX & XI-te chu tuna kalpui mek angin an kal chhunzawm ang.
• HS leh HSS zirlaite an duh chuan hostel-a awm phalsak an ni; Covid-19 lakah an fihlîm tih finfiahna a ngai thung.
• Pawl 1-8 zirlaite chu sikul an la kal lo dawn rih lo a, an kal hun tur chungchang November-ah ngaihtuah leh a ni ang.