Serchhipah zirlai ti ṭhate chawimawi
MZP headquarters, Serchhip chuan nimin khan Serchhip khawpui chhunga HSLC distinction-a pass-te chawimawina hun DC conference hall-ah an buatsaih a, DC Dr Lalrozama'n a hmanpui.
Zirlai ti ṭha chawimawina hun hi Serchhip MZP president T Biakchamliana'n a kaihruai a; Serchhip DC chuan, lehkhathiam inti zingah hnathawh tur nei lo an awm ṭhin tih sawiin, "Lehkhathiam inti hnathawh neih loh vanga lungawi lo leh tur si chuan lehkha zir lo mai rawh se, nun chhiatna bul a ni. Lehkha hi hmasawnpui tura zir kan ni a, pass percentage sang hi a pawimawh rualin kan zirna hian thiamna min puak chhuahtir em tih ngaihtuah a ngai," a ti.
Dr Lalrozama chuan, zirlaibu páwn lam pawh nasa taka zir a ngai tih sawiin, "Kan hunte hi minute khat kan hman inchher chhuanin a siam a ni a, minute tin leh ni tina kan thutlukna siam dan a pawimawh. Kan thil hmuh leh hriatte hlâwkpuina atana hmang thei tura chhinchhiah zel leh chiang zawka hriat tum zel a ṭul a ni," a ti a; hlawhtlinna atan Pathian ṭih a pawimawh hmasak ber thu a sawi.
Khualzahawm K Sapdanga, Vanglaini editor chuan, hlawhtlinna chu sikul emaw, zir tur thlan fuhah a innghat lo tih sawiin, "Mizo zingah mithiam chhawr tlak kan tam tawh a, min chhawrtu sorkar lamin min chhawr hneh lo a, hna thawh turin min daih ta lo. Hna thawh tur awm lo hi ṭhalaite harsatna chauh a ni tawh lo a, Zoram pum harsatna a ni. He harsatna hi sutkian thuai a nih loh chuan harsatna nasa zawkah kan ram hi min hnûk lut thei a ni," a ti.
State changkang leh hmasawn zingah ṭhalaite'n an hma lam hun atan sorkar hna an ngaihtuah ngai lo tih sawiin, K Sapdanga chuan, "Tun dinhmunah kan ṭhalaite hian sorkar hna lo chu future an nei rih lo. Kan
ṭhalaite hi hna thawk turin an inpeih a, lehkha an zir pawhin distinction-ahte an pass thei a, chuvang chuan kan ram leilung behchhana hna thawh tur kan duh," a ti a; Mizo ṭhalaite'n hma lam hun tur an mamawh thu a sawi.
Zirlai chawimawina pekte hi Serchhipa high school 14-a distinction-a pass mi 14 an ni a; sikul 14 zingah hian distinction-a pass nei sikul pali an awm a ni.