Zirna hi kil hrang hranga mihring tihhmasawnna tur a ni: Rohluna

School Education minister H Rohluna chuan, "Education kan tih hian zirna ringawt a ni lo a, kil hrang hranga mihring tihhmasawnna tur a ni a. Infiam hi thluak leh taksa sâwizawina a ni," a ti.

Nimina SSA Mission leh Mizoram Football Association (MFA)-in School Education directorate conference hall-a grassroot football atana Memorandum of Understanding an ziahnaah thu sawiin H Rohluna chuan, zirlai naupang
ṭhahnem takte football zir theihna tura SSA leh MFA-in thawhhona thuthlung an ziak chu Mizoram tan méllung pawimawh a nih thu a sawi.

H Rohluna chuan, MoU ziah tak chu zirlaite'n hun âwl an hman ṭhat nan a ṭangkai hle dawn tih sawiin, "Naupangte an nun kaihhruai zelna turah a ṭangkai hle dawn. Bul kan ṭan tawh a, kan ti rau rau a nih chuan kan hlawhtlinpui tur a ni," a ti a, grassroot football atana mawhphurtute chu an tih tur ṭheuh hlen chhuak turin a chah. Mizoramah khelmual ṭha siam turin phai lam nen senso a insân hleih hle chungin, Mizoram chu a ṭhenawm state zingah infiamna hmunhmá nei ṭha ber a nih thu a sawi bawk.

MFA president leh Cabinet minister Lal Thanzara chuan, "SSA leh MFA thawh dunnaa grassroot footbal a hlawh-tlin theih nan MFA chuan theihtawp kan chhuah dawn tih a ni," a ti a; I-League season hnuhnung berah khan Indian player zawng zawng zinga 20% vel chu Mizo an nih thu leh, India ram aiawha age level hrang hrang leh senior team-ah tunah chuan player zinga 15% vel chu Mizo an nih zel tawh thu a sawi.

Mizorama sikul hrang hranga grassroot football kalpuinaa SSA leh MFA thawhhona turah hian MFA-in trainer an tum dawn a; grassroot football hi Mizoram khaw hrang hranga sikul 60-ah kalpui tur niin, sikul pakhatah naupang 60 zel an awm thei dawn a, zirlai naupang 3,000-in football an zir thei dawn a ni. Grassroot football hi sorkar sikul leh sorkar ṭanpuina dawng (aided) sikulah kalpui phawt a ni ang.