Bahra laih vangin mi pakhat a thi: MNF

MNF chuan thuchhuah siamin, May 22, 2016 khan Saitirai (46), Thaidawr khua chu bahra a laih mek khurin a chim hnan avangin a a thi niin an tarlang a, "He vanduaina thleng hi pawi kan ti a, lusûn chhungte kan tawrhpui tak zet a ni," an ti.

MNF chuan, Congress sorkarin buhfai a tam thu leh fûr daih chhêk khâwl a nih thu an puan ṭhin laia buhfai neih loh vanga bahra laih ngaia Mizoram khua leh tui ngei an awm chu pawi an tih thu sawiin, "Nunna hlu tak chán a awm phah hi hriatthiam har kan ti tak zet a ni," an ti a; Saitirai thihna chu sorkar inthlahdah vang leh mawhphurhna hlen zawh lohzia tarlannaa an ngaih thu an sawi.

Mautam tam harsat ber lai pawhin MNF sor-kar laiin a thlâwnin buhfai an sem thei tih sawiin, MNF chuan, "Supply Minister-in, 'Kum 30 zet minister nih tumin ka lo bei tawh a, chuti maiin minister aṭangin ka báng dawn lo,’ tiin a sawi a. Ram leh mipuite rawngbawl aiin mahni sahmîm tihpuarna ringawt ûm Supply Minister hian a hna a tlin thlâwt lo tih hriain, politic aṭanga inthiar fihlimin, minister
aṭanga bâng turin kan ngen nawn leh a ni," an ti.