Covid-19: Mizoram dinhmun 2,184 zinga 2,046 chhuak tawh
October 11, Pathianni khan Mizoramah Covid-19 vei mi pakua hmuh chhuah an ni a, Mizorama kai chhâwng vek an nih bakah, pangain Covid-19 symptom an nei. Nimin khan mi 36 chhuahtir an ni thung a; hripui vei hmuh chhuah tawh mi 2,184 zinga 2,046 (93.68%) chhuahtir an ni tawh.
Mizorama Covid-19 positive hmuh chhuah tawh chu mi 2,184 an ni a, mipa 1,799 leh hmeichhia 385 an ni. An zinga mi 2,046 (93.68%) chu an fihlîm tawh avangin an chhuak tawh a, enkawl mek mi 138 (6.32%) an la awm.
Pathiannia Covid-19 vei hmuh chhuahte chu Rapid Antigen Test hmanga endik vek niin, mipa paruk leh hmeichhia pathum an ni a; a naupang ber kum 1 mi a nih laiin, a upa ber chu kum 58 a ni.
Dawrpui veng mi pasarihin hripui an vei tih Pathianni khan hmuh chhuah a ni. Sorkar thuchhuah tarlan danin, an zinga pakhatin symptom a nei a; mi pahnih chu an kaina àwm hriat theih a nih laiin, mi panga chu an kaina àwm hriat theih a ni rih lo.
October 11, Pathiannia Dawrpui veng mi hripui vei hmuh chhuah zat hi sorkar thuchhuakin mi pasarih an nih thu a tarlan laiin, Dawrpui Local Task Force chuan mi pariat a nih thu an tarlang. Nimina thuchhuah an siamah mi pariatte chu an hming nen an tilang a ni.
Covid-19 positive hmuh tharte zinga pahnih chu Tuikual North-a mi an ni a, an veng mi October 10, Inrinnia hripui vei hmuh chhuahte aṭanga kai chhâwng nia ngaih an ni. Covid-19 symptom an nei tih sorkar thuchhuahin a tarlang.
Covid-19 positive enkawl zinga fihlim tawh mi 36 chu nimin khan chhuahtir an ni a; Berawtlang CCC aṭangin mi pakhat leh Sazaikawn, Lunglei CCC aṭangin mi 35 an chhuak a ni.
October 11, Pathianni khan district pali - Aizawl, Kolasib, Serchhip leh Saitual-ah RAT hmangin mi 852-te swab sample endik a ni a; ZMC laboratory leh district hospital hrang hranga TrueNAT laboratory-ah erawh endik a ni lo.