Mizoram sorkarin lungawi loh thu Assam sorkar leh MHA-ah a thlen

Mizoram sorkar chuan Mamit district-a Thinghlun rama Karimganj, Assam-a sorkar mi leh sate chêt dana an lungawi loh thu Assam sorkar hnenah an thlen a, a copy chu Ministry of Home Affairs-ah an thawn bawk.

Home department aṭanga Vanglaini thu dawn danin, Karimganj-a Assam sorkar official-te chêt dana an lungawi loh thu hi October 11, Pathianni zan khan Assam sorkara Home department changtu Addl. Chief Secretary hnenah ziakin thlen a ni a; he thu ziah lai thleng hian chhànna dawn a la ni lo.

Hetih lai hian, Thinghlun rama Assam sorkar mi leh sate chêt hma tawh khan MHA chuan Assam-in anmahni aṭanga in dangte nena ramria buaina an neih chu a ngaimawh a, hmalak a tum nia thu dawn a ni.

MHA chuan, state tin aiawhin anmahni aṭangin ramri chungchang buaipui turin nodal officer a ruat bakah, state-te chu nodal officer tur ruat ve turin a ti a; Mizoram nodal officer atan Joint Secretary (Security) ruatin, Mizoram sorkar chuan Home department-a addl joint secretary Ramdinliani a ruat a ni.