Ramriah boruak ṭha lo a awm zui lo; Thinghlunah police dah belh a ni YMA-in Police awmna tur an sa
Assam mi leh sate'n Thinghlun khaw mi te thlam hal a, an thlai an tihchhiat avangin Thinghlunah Mizoram sorkar chuan police a dah belh zel. Police-te awmna tur hian Langkaih Group YMA chuan thlam hal tak bulah nimin khan hnatlangin in an sa a; boruak tha lo a awm zui lo.
Mizoram police hotute hnen atangin Vanglaini thu dawn danin, Thinghlun hi police border outpost (POB) awmna sa a ni a, tun hnaia Assam mite thi tih avangin Mamit atangin 4th IR police eng emaw zat dah belh a nih hnuah nimin khan Aizawl atangin 1st Bn. MAP sipai thahne tak tirh belh leh a ni. Police-te hi 4th IR Bn commandant Lallianmawia hovin Thinglhunah an awm rih ang.
Thinghluna police dah belh nih bakah hian Mamit district chhunga BOP danga awmte chu inralring reng tur leh a tul huna che nghal thei tura hriattir an ni.
Mizoram police htute chuan, tun dinhmunah chuan Thinghluna police dah zat chu a tawk riha an hriat thu an swi a," Boruak awm dan azirin dah belh a ngai thei. An awm chin tur hriat lawk theih a ni lo a, boruak thlir chungin hma lak zel a ni ang,"an ti.
MZP-ten October 14, Nilai ni a thlam sak that an tum chungchanga zawhn chhangin Mizoram Police hotute chuan, thlam sa turte dan tuman an neih loh thu an sawi.
Langkaih group YMA chuan nimin khan hnatlang koin,Assam police leh Forest mite'n October 9-a thlai an tih chhiatsak Bendavida huanah police-te awmna tur an sa. Hnatlangah hian YMA branch pariat atangin member engemaw zat an thawk chhuak a ni.
Langkaih group YMA hnuaiah hian branch 14 an awm a, branch paruk chu Assam lama Zo hnahthlakte an ni a, hnatlangah hian an thawk chhuak ve thei lo.
Vanglaini palai zawhna chhangin 4th IR commandant Lallianmawia chuan, boruak tha lo a awm zui loh thu a sawi a, "Nimin (Pathianni) tlai khan Assaam police-te anmahni ram nia kan ngaih chin thleng an rawn kal a, kan awmna chu an rawn pawh lo. Rei vak lo an awm hnuah an kir leh mai. Vawiin (nimin) lamah chuan thawm an rawn nei lo hrim hrim," a ti.