MP Rosanga'n NE-ah leilung hausakna dap ngawrh turin ngen

Parliamentary Committee on Coal and Steel ruat tharte chu a vawi khatna atan nimin khan Parliament Committee Room-ah an ṭhukhawm a; Mizoram aṭanga Lok Sabha MP C Lalrosanga pawh telin, India hmarchhak bialah leilung hausakna dap ngawrh a ṭul thu a sawi.

C Lalrosanga chuan, hmar­chhak bial tlangram state hrang hrangah sorkar laipuia Ministry of Mines hmalakna a la tlem hle tih a sawi a; ngawrh zawka leilung hausakna dap chhuahna lama hma la turin Committee chu a ngen a ni.

Parliamentary Committee on Coal and Steel chairman Rakesh Singh chuan, India hmarchhak biala leilung hausakna dap chhuak tura hma lak dan turte sawihona hun tam zawk siam a nih tur thu a sawi a, "Ministry of Coal leh Ministry of Steel bakah, Ministry of Mines hmalak dan turte sawiho leh zir chian a ni ang," a ti.