Ni 2 chhunga hripui vei hmuh zingah Mizorama kái chhâwng an tam zawk

October 10 leh 11, ni hnih chhungin Mizoramah Covid-19 vei mi 22 hmuh chhuah an ni a; an zingah Mizoram chhunga kái chhâwng (local positive contact) an tam zawk. Mizorama kai chhawng zat chu mi 15 an ni a, pasarih chu state páwn aṭanga rawn lut an ni thung.

Sorkar thuchhuah tarlan danin, October 11, Pathiannia hripui vei hmuh chhuah mi pakuate chu Mizoram chhunga kái vek an ni a; an zinga pali chu an kaina àwm hriat a nih laiin, mi pangate chu an kai ṭanna àwm hriat a ni rih lo. Mi pakua zinga panga chuan taksaah harsatna an nei (Covid-19 symptom a lang).

Pathiannia Covid-19 positive hmuh chhuah zinga pahnih - Tuikual North-a nupa chu an veng mi paruk, October 10, Inrinnia hripui vei hmuh chhuahte aṭanga kai chhâwnga ngaih an ni a; symptom an nei ve vea sawi a ni.

Tuikual North-ah hian October 10 khan RAT hmangin hripui vei mi paruk - mipa leh hmeichhia pathum ve ve hmuh chhuah a lo ni tawh a; anni pawh hi an kai ṭanna awm hriat theih a ni lo. An vai hian chhungkaw khata mi vek an ni a, an zingah nautê thla riat mi a tel.

Pathianni vêka hripui vei hmuh chhuah dang mi pasarihte chu Dawrpui veng mi vek an ni a; mipa panga leh hmeichhia pahnih an ni. Dawrpui tlâk lama awm mi pahnih (nufa) chuan an kaina awm an hre thei lo a; anni hian symptom an nei a ni.

Mi dang panga chu Dawrpui veng chhim lama awm an ni a, pakhatin symptom a nei. An zinga pahnih chu Dawrpui veng mi thote aṭanga kai nia ngaih an ni a; mi dang pathum erawh chu an kàina hriat a ni lo.

Thu dawn danin, Dawrpui vengah hian tun dinhmunah Covid-19 positive mi 16 an awm mek a, Mizoram chhunga kái chhâwng veka ngaih an ni. October 6-ah chhungkaw khat aṭangin Covid-19 vei mi paruk hmuh chhuah a ni a, October 8-ah mi pahnih (nupa) hmuh leh a nih hnuah, October 11 khan mi pariat hmuh chhuah a ni leh ta a ni.