International Girl Child Day lawm
International Girl Child Day, 2020 lawmna leh Beti Bachao Beti Padhao (BBBP) puala Serchhip District Photography Competition lawmman semna inkhawm chu nimin khan Serchhip DC conference hall-ah buatsaih a ni a, additional DC Lalmuansanga Ralte-in a hmanpui.
Lalmuansanga Ralte chuan, fanute chu fapate ang bawka enkawl a, an dam chhunga dinhmun ṭha leh ngêlnghet an rah ngei theihna atana ṭanpui a ṭul thu sawiin, "India rama kan dinhmun thlir chuan nasa taka ṭan lak a la ṭul thei ang. Mizoram anga thlir erawh chuan kan dinhmun a chhe lutuk loa ngaih theih a ni," a ti a; fanute aiin fapate zawk an ngaihtuahawm lek lek theia a lan thu a sawi.
BBBP hmalakna atana an district thlan a ni chu lawmawm a tih thu sawiin Lalmuansanga chuan, "Serchhip hi hmeichhiate dinhmun duhawm taka an dinna district a ni a, India rama district dangte tan pawha entawntlak nih tum zel ila a duhawm," a ti.
BBBP Serchhip District Photography Competition-a lawmman dawngtute chu - DSLR category-ah pakhatna Mathew Lalruatkima, Serchhip Bazar Veng, pahnihna Lalrinliana, Serchhip Vengchung leh pathumna Lalramliana, Serchhip Vengchung an ni.
Mobile phone category-a lawmman dawngtute chu - pakhatna, Sailoliana East Lungdar, pahnihna Jacob Ramdinthara, Serchhip Leisang Veng leh pathumna Richard Zorinsanga, Thenzawlte an ni.