Sorkar sum tihchingpen vangin CADC hotu hluite hrem an ni

Dik lo taka sorkar sum hman avangin Chakma Autonomous District Council (CADC)-a chief executive member hlui leh chairman hlui Kali Kumar Tongchongya leh a fapa Julius Tongchoinggya bakah, CADC deputy chairman hlui Purna Munia Chakma te chu court-in thiam loh a chantir a, kum 4 ṭheuh tang tur leh Rs 3,00,000 ṭheuh chawi turin a hrem.

Kali Kumar Rong­chongya, Julius Tong­chongya leh Purna Munia Chakma te lakah hian IPC Section 409 leh PC Act Section 13(2) (r/w 13(a) & (b)) tlawhchhanin thubuai ziah luh a ni. Anni pathum hi special judge (PC Act) Dr HTC Lalrinchhana chuan May 31, 2024 khan thiam loh a chantir a, bail-a an chhuah mekna sûtin, jail-ah dah luh nghal a ni.

Special Court (PC Act) chuan nimin khan hremna tur a puang a; Kali Kumar Tongchangya, Julius Tongchangya leh Purna Munia Chakma te chu kum li (4) ṭheuh táng tur leh, Rs 3,00,000 ṭheuh chawi turin a hrem a, pawisa an chawi loh chuan thla 9 dang tan belh turin a ti bawk.

Julius Tongchongya chungchanga dan bawhchhiatna leh hlemhletnaah hian Julius Tongchangya-a hlawh lâkna Acquittance Roll aṭanga chhût danin, sorkar/mipui sum Rs 17,35,183 an eia chhût a ni.

Aizawl District Court-a Special Court (Prevention of Corruption Act) thuremnain a tarlan danin, kum 2014 bawr vela Kali Kumar Tongchongya CADC chairman a nih lai, July 17, 2014-ah a fapa Julius Tongchongya chu co-terminus-in a personal assistant (PA) atan lak a ni. Julius Tongchongya hian July 18, 2014-ah hna zawmna a thehlut a, chumi rual chuan CADC deputy chairman Purna Muni Chakma hnenah lehkha zir tura chawlh (study leave) dilna a thehlut nghal a, phalsak a ni.

Julius Tongchongya hian Doon (PG) College of Agriculture Science & Technology, Dehradun-ah kum thum chhung B.Sc. (Horticulture) a zir a, chumi hnuah Aptech Computer Education, Dehradun-ah kum hnih chhung Advance Computer Course a zir leh bawk.

Hemi chungchangah hian United Chakma Alliance (UCA), Bangalore vice president Udondi Chakma chuan Mizoram Lokayukta-ah April 9, 2019 khan complaint a thehlut a ni. Lokayukta chuan chhui zuiin, Central Civil Services (Leave) Rules, 1972 angin co-terminus (hun chhung bik nei)-a sorkar hna thawk tan study leave lak theih a nih loh laiin, Julius Tongchongya chu a pa, Kali Kumar Tongchangya, CADC chairman chuan ṭawngkain a phalsak a, deputy chairman Purna Munia Chakma pawhin a phalsak tih finfiah a ni.

Julius Tongchangya chu CADC Chairman PA atan September 16, 2014 rawih nawn leh a ni a, July 17, 2015-a thawk ṭan anga ziah a ni. CADC Chairman atana lak ni mah se, September 16, 2015-ah a hna chu LDC tiin a pa KK Tongchangya chuan a thlak a, September 21, 2015 khan LDC atan dah ngheh zui a ni. Sorkar hna atana lak a nihnaah hian exam leh interview a awm lo.

Special Court chuan, "Study leave an pekna lehkhaah hian Julius Tongchangya hi B.Sc. (Horticulture) zir mek a nih thu pawh tarlan a ni a, amah leh an chhungkaw bil hamṭhatna tur liau liaua study leave hmang hian mipui suma a zirna chhunzawmtir a ni tih a fiah hle," a ti.

Julius Tongchangya leh a pa Kali Kumar Tongchangya te chu la khawsaho vek an nih thu te, mipui sumpai hmangin B.Sc. leh Advance Computer Course an inzirtir thu te, Kali Kumar Tongchangya-a'n dikhlel takin a fapa lehkha a zirtir a, mipui sumpai aṭangin hlâwkna a têl ngei tih finfiah a nih thute tarlan a ni bawk.

Kali Kumar Tongchangya hi Special Court (PC Act) chuan eiruk thubuai dangah September 25, 2023 khan thiam loh chantirin, kum 4 chhung táng tur leh Rs 4,00,000 chawi turin a lo hrem tawh a ni.