RTE Helpline video clip tlangzarh

Mizoram State Commission for Protection of Child Rights (MSCPCR) chairperson Sangzuali Vanchhawng chuan nimin khan a pisaah RTE Helpline promotional video clip a tlangzarh.

Video clip hi zirlai naupang, an zirnaa harsatna tawkte'n an biakpawh theihna tura MSCPCR-in RTE Helpline an siam mipuiin an hriat theihna tura a ruahman a ni a; zirlai harsatna neite'n helpline number 60098 88804-ah call, SMS leh WhatsApp hmangin an thlen thei dawn a ni.

Sangzuali Vanchhawng chuan, Parliament dan siam ‘The Commissions for Protection of Child Rights Act, 2005’ hnuaiah leh RTE Act, 2009 hnuaiah MSCPCR chu RTE Act kenkawh dan viltu tura ruat a nih thu a sawi a, "Parliament-in a beiseina tihlawhtling turin zirlaite'n harsatna an tawh an thlen theihna tur RTE Helpline siam a ni," a ti.

Tlangzarh inkhawmah hian MSCPCR member Dr Julie Remsangpuii Fambawl-in RTE Helpline buaipui dan a tarlang a; Mizorama zirlaite'n ṭangkai taka an hman theihna turin RTE Helpline kalphung tarlanna poster, sikul zawng zawnga târ tur chu SSA nen ṭangkawpin an buatsaih thu a sawi.