KHAWTHLIR

Melthum library tichhetute dem

Mizoram Library Association chuan thuchhuah siamin, June 1, 2024 Inrinni zana Melthum leh Hlimen inkara buaina thlengah Melthum YMA Library tihchhiat a ni leh bungrua leh lehkhabute suasam a ni chu pawi an tih thu an tarlang a; "Pawi khawihnaa mawhphurtute kan dem tak zet. YMA library-te hi vantlang leh khawtlang tana zirna in pawimawh, sorkar sum tam tak sénga din leh tihchangtlun an ni a, library tihchhiat a ni hi a lungchhiatthlak hle a ni," an ti.

Pass-te lawmpui

Ephraim Higher Secondary School, Vaivakawn chuan kumin HSLC leh HSSLC-a an sikul aṭanga pass-te lawmpuina inkhawm nimin khan Vanapa Hall-ah an buatsaih a, Govt. deputy chief whip W Chhuanawma'n a hmanpui. Kumin HSLC leh HSSLC-ah khan Ephraim HSS-a zirlaite an pass vek a ni. W Chhuanawma chuan, "Zirna hi lehkhathiama inchher chhuahna ringawt tur a ni lo a, mithiama inchher chhuahna tur a ni," tiin, zirlaite chu duhsakna a hlan.

AMC by-election

AMC Ward XIX by-election June 25, 2024-a neih tur chungchangah nimin khan hriattirna chhuah a ni. Inthlana chuh tumte tan June 6, 2024 tlai dar 3 thleng Municipal Returning Officer (Addl. DC Office, Aizawl) hnen aṭangin nomination form lak chhuah theih a ni a, a hnenah vek nomination thehluh tur a ni.

World Milk Day

Central Agricultural University hnuaia College of Veterinary Sciences & Animal Husbandry, Selesih chuan June 1, 2024 khan Durtlanga home/centre pahnih - Synod Rescue Centre leh Hermon Children’s Home-ah World Milk Day an hmang a, CVScAH dean Dr Lalnuntluangi Hmar-in a hmanpui. World Milk Day hi kum 2001 aṭangin Food and Agricultural Organisation (FAO) bultumin khawvel pumah hman ṭhin a ni.

CM Relief Fund

Nimin khan pawl leh mimal 11-te'n Chief Minister's Relief Fund-ah Rs 3,53,500 an chhûng lut. Chief Minister chuan CMRF-a sum thawhtute chungah lawmthu sawiin, "Tun hnaiah Mizoramin leilung chhiatna a tawrh nasat avangin Relief Fund kan sem chhuak nasa a, kan mamawhna a sang hle a ni," a ti.