MNF-in Assam chêt dan an dem

MNF party chuan thuchhuah siamin, October 9, 2020-ah Assam sorkarin a police-te hmanga Thinghlun khaw dáia John Zolawma thlám an hâl chu an dem tak zet thu leh Mizoram chhunga Assam sorkar chêt dan chu pawm zam harsa an tih thu an tarlang.

Thil thleng chungchangah Mizoram sorkarin rang takin hma a la tih sawiin MNF chuan, "Mamit DC leh SP hoa a hmun thleng thla nghal a, a ṭul ang ang an ti nghal hi lawmawm kan ti. Kan MP Pu C Lalrosanga pawhin Silchar MP be nghalin thil awm dan a hrilh a, Mamit SP a be nghal bawk," an ti a; John Zolawma thlâm chu sak ṭhat nghal tuma hmalak a nih thu an sawi.

MNF party chuan, Mizoram chin humhalhna kawngah leh Mizoram chhungah Assam sorkar an chêt tawh lohna turin Mizoram sorkarin theihtawpin hma la zel se an duh thu tarlangin, "Assam sorkar kut thlâwn Mizopain a tawrh loh nan hmalak ṭha kan ti a, Pu Zolawma hi Assam sorkarin zangnadawmna pe ngei se tih hi MNF duh dan a ni," an ti.

Mizoram chin humhim chunga Mizote'n an chèn chilh chhunzawm zelna tura hmalak zel ṭul an tih thu sawiin MNF chuan, "Ramri depahte hian a mi chengte himna leh hmasawn nan a remchan ang zela chak taka hmalak zel hi thil ṭul takah kan ngai," an ti. Mizoram chin humhalhna kawngah Mizo mipui inlungrual a ṭul thu sawiin, sorkar hmalakna en chunga ram tana pên zel turin mipui an ngen a ni.