MBOCWWB-ah mi 54,342 inziak lut Document lem hmanga tel tum an awm ṭhin

Mizoram Building  & Other Construction Workers Welfare Board (MBOCWWB)-ah hna thawktu mi  54,342 an inziak lut tawh a; inziak lutte hnenah ṭanpuina sum tam tham tak pek chhuah a ni tawh. Hetih lai hian, document lem hmanga inziah luh tum an awm ṭhin bawk.

MBOCWWB hotute chuan, Board-a inziak lut zingah danin member ni tura a phût ang ni lo chunga inziak lut an awm thu leh, an endikna aṭanga an man chhuah leh tâk an awm ṭhin a, sum duh vanga dik lo taka thil tih tum man chhuah an awm fo thu an sawi a ni.

Vanglaini palaiin a kawmnaah MBOCWWB hotute chuan, an hnena inziak lutte chu damdawi-ina an awmin, dah luh an nih aṭanga chhiarin ni khatah Rs. 1,000 an dawn theih thu leh, an dawn zawng zawng chuan kum khatah Rs. 50,000 a pêl tur a nih loh thu an sawi.

Damdawia inenkawlna atana ṭanpuina dil chungchangah dan loa thil ti man an awm fo thu sawiin, "Discharge certificate lem kan man chhuak ṭhin. An awmna damdawi-in kan bia a, kal chilh cháng pawh kan nei. Ni 4 awm ta se, 0 ziah belha ni 40 awm anga inziak te, document tihdanglamte kan man chhuak fo," an ti.

Welfare Board hotute chuan, MBOCWWB member-ah danin inziak lut thei a tih chinte chauh lak theih a nih thu sawiin, "Member inziak lut turin VC/LC aṭanga hriatpuina thil tel ngai a awm. Chutih laiin, VC/LC zingah Welfare Board member ni thei si lo, ni thei anga ziahsak mai chíng an awm," an ti a; a theih chin chinah an lo enfiah zel avangin paih an neih fo thu an sawi.

MBOCWWB hotute chuan, member per­centage záwnga chhûtin Mizoram chu India hmarchhak bialah ti ṭha ber a nih thu sawiin, "Covid-19 vanga member ṭanpuina chungchangah pawh India ramah a pe chhuak ṭha ber kan ni," an ti. 

*    Welfare Board member tan hamṭhatna pek ṭhin a ni. Kum 2014-2020 chhung khan thihna (natural-ah) avangin mi 203 hnenah hamṭhatna pek tawh a ni tawh a, mi pakhat tan Rs. 1,00,000 zel pek niin, a vaiin cheng nuai 203 pek a ni tawh. Chetsualna avangin mi 13 hnenah ṭanpuina pêk tawh a ni a, mi pakhatah Rs. 3,00,000 zel pek niin, a vaiin Rs. 39,00,000 pek a ni tawh.

*    May 5, 2020 thleng khan medical benefit-ah ṭanpuina mi 1,236 pek tawh a ni.

*    Kum 2016-17 khan inneihnaah hamṭhatna pêk ṭan a ni a, mi 31 hnenah pek tawh a ni. Mi pakhat hnenah Rs. 5,000 zel pek a ni a, a vaiin Rs. 1,55,000 pek a ni tawh.

*    Pawisa pek chhuahna tam ber chu Children Education Assistance (CEA) a ni a, mi 66,937 hnenah pek a ni tawh. Kum 2019-20 chhung khan mi 37,641 hnenah pek a ni. CEA-a pek pawh zawng zawng chu Rs. 14,07,02,000 a tling.