Hmalak dan tur ruahmanna siam
Hnahthial District Task Force on Covid-19 chu nimin khan an chairman Vanlalmawia, bawrhsap hoin DC conference hall-ah an ṭhukhawm a, hmalak tawhna hrang hrang thlir lêtin, hmalak zel dan tur an ruahman.
Vanlalmawia chuan, an district-ah Covid-19 vei an awm rih loh thu a sawi a; hma latu zawng zawng chungah lawmthu sawiin, theihtawp chhuah zel turin a sáwm.
Meeting-a tarlan danin, Hnahthial district-ah Covid-19 do ṭan tirh, kumin February aṭanga tun thlengin hripui vei mi panga hmuh a ni tawh a, an vaiin hripui lakah an fihlim tawh. Enkawl dam zinga covid care centre chhuahsan hnuhnung berte'n September 26 khan an chhuahsan.
Covid-19 donaa inpe damdawi lam thiam - doctor, pharmacist, laboratory technician, etc. mi 30 vel Hnahthial district-ah an awm. Tun dinhmunah khung hran mek mi 31 an awm a, an zinga pahnih chu sorkar quarantine facility-ah awmin, mi dang chu company ho hmuna khung hran an ni. Swab sample endik tawh zat chu 489 a ni.
Hnahthial district chhunga hmasawnna hna thawk mek company - ABCI, Sadguru, BIPL leh SLT Infracon ten an hnuaia thawkte inkhung hranna hmun an siamte chu sawiho a ni a; a hmunah enfiah vek tawh a nih thu leh ṭha thawkhat viaua an hriat thu an tarlang.
Inrinni zinga Hnahthial Bazarpui kalpui dan turah, village task force-te'n lo en zui zel se, an ti a; October 15, 2020 aṭanga zirna-in hawn chungchang thlirho a ni bawk.