KHAWTHLIR

Information & Public Relation department leh Mizoram Art Development Society chuan nimin aṭang khan ni nga chhung awh tur Online Arst Workshop an buatsaih a, IPR director Lallianpuii'n a pisa aṭangin a hawng. Workshop-ah hian Aizawl, Bilkhawthlir, Ruantlang, Khumtung, Lunglei leh Kolkata aṭangin lemziak thiam mi 57 an tel a ni.

Mamit SP Shashank Jaiswal chuan thupek chhuahin, Bairabi-Zamuang kawnga Teirei lei (bailey bridge) chu a foundation a chak tâwk loh avangin, TATA 407 truck aia lian (TATA 407 chin hnuai lam tiam loin) zawh khap a nih thu a puang. Thupek hian November 12, 2020 thleng a huam ang.

Mizorama RUSA hnuaia thawk (faculty)-te chuan May 2020 aṭangin hlawh an la tawh lo. Thu dawn danin, RUSA hnuaia thawkte hlawh tur chungchangah hian Chief Minister leh Higher & Technical Education Minister-te chuan sorkar laipuiah DO letter an ziak tawh a, mahse, sorkar laipui lamin nimin thleng khan a la pe chhuak lo.

State Referral Hospital-ah nimin khan Covid-19 vei mi 11 dah luh an ni a, anni nen mi 28 enkawl mek niin, ICU-ah mi pahnih leh Isolation Ward-ah mi 26 an awm. SRH-ZMC Bulletin tarlan danin, ICU-a enkawl mek pakhat chu a thaw a hah deuh avangin oxygen pek a ni a, ward-a awm zingah khawsik leh thawhah nasa vak lo nei an awm nual bawk.

Mamit DC Dr Lalrozama chuan thuchhuah siamin, sorkar hriatpui loh leh dan loin online emaw, offline emaw hmanga electoral photo identity card (EPIC) kaihhnawih reng reng buaipui phal a nih loh thu a tarlang. Dan bawhchhiaa thil ti leh EPIC kaihhnawih khawihte chu dan anga hremna a nih theih nan a rang lama FIR thehlut tur leh FIR copy chu district thuneitute hnena thlen turin mipui a ngen a ni.