Rangkachak suam thubuai Rangkachak awmna la hre lo Police-in mi 14 an man tawh

December 14, 2015 zana Melthum dái, Zampuimanga thlân bula rangkachak cheng vbc. 14.2 hû tawlhrûk suam leh rûkbo thubuai chu police-te'n ngawrh takin an chhui zel a, rangkachak awmna erawh an la hre lo. He thubuai kaihhnawihah hian police-te chuan mi 14 an man tawh.

Thubuai chhui tura din Special Investigation Team (SIT) chuan ngawrh takin an chhui zel a, tun hnai khan 39 Assam Rifles-a havilder Raja Pati an man belh leh a, ani nen hian 39 Assam Rifle sipai 10 an man tawh.

Thu dawn danin, Hav. Raja Pati hi Zampuimanga thlân bula insuamnaah khan a tel a, chawlh a lâk avangin a ṭhiante rualin an man lo a ni. Chawlh a hman zawh hnuah police-ah in-report-in, an lo man a, thu zawhfiah atan police-in an kawl mek.

Hav. Raja Pati hian Zampuimanga thlâna insuamnaa tela puh Assam Rifles sipaite ang thoin rangkachak phur an suam ngei thu leh rangkachak chu 39 AR commandant Col. Jasjit Singh hnenah an hlan thu police-te a hrilh.

Raja Patil-a'n police-te a hrilh danin, rangkachak an suam zan hian bike-in mi pahnihin rangkachak an phur a, an hmun (39 AR compound) an panpui. A tûkah an commandant Col. Jasjit Singh chuan insuamnaa telte chu kokhawmin, lawmthu a hrilh bakah, an thil tih chu sawi chhuak lo turin a ti a, pawisa a pe ṭheuh a ni.

A hmaa police-in an lo man tawh 39 AR sipai pariatte pawhin Hav. Raja Pati sawi ang hian rangkachak chu Col. Jasjit Singh hnena an hlan thu leh a tûkah kokhawmin lawmman pawisa a pek thu police-te an lo hrilh tawh a ni. Col. Jasjit Singh erawh chuan, rangkachak phur suamnaah hian inhnamhnawihna a neih loh thu a lo sawi tawh thung.

Col. Jasjit Singh hi May 4, 2016 aṭanga police-te'n thu zawhfiah atana an kawl hnuah May 18 khan Central Jail-ah dah luh a ni a, jail-a dah luh a nih hnuah police-te'n thu an la zawtfiah leh lo. Thu dawn danin, Col. Jasjit Singh hi insuamnaah a inhnamhnawih ngeia hriat ni mah se, a inpuan duh loh avangin police-te chuan finfiahna ṭha neih tumin theihtawp an chhuah zel a ni.

He thubuai kaihhnawiha man zingah civil mi - Lalmuanawma Mathipi, Bulaki Chand Baid leh Joseph Lalrosiama te chu an hriselna dinhmun avangin Court-in bail-in a chhuah tawh a; bail-a chhuah hnuah SIT-in thu an la zawtfiah leh lo. Lalmuan-awma Mathipi leh Bulaki Chand Baid te chuan insuamnaah an inhnamhnawih thu police-te an hrilh tawh.

Police-te'n he thubuai kaihhnawihah mi 14 an man tawh bakah hian, an man loh thu zawhfiah mi eng emaw zat an awm tawh a, hmun ṭhenkhat rinhlelhawm nia an hriatte pawh an dap tawh a ni.