KHAWTHLIR

Chawlh puang

Mara Autonomous District Council (MADC) huam chhung khaw pathum - Saikao, Theiri leh Lotai khuaahte May 26, 2016 hian V/C bye-election neih a nih dawn avangin Governor chuan heng khaw pathumte tan hian May 26 hi sorkar chawlhah a puang.

La tlang lo

May 22, 2016 tlai dar 4 vela Kawnpui dái leiminin NH-54 kawngpui a hnawh chu lirthei kaltlang theiha thenfai a la ni lo. Nimin leh nizanah leimin then hna thawh a ni a, vawiin
chhunah chuan lirthei kaltlangtir theih beisei a ni. Kawng pin avang hian lirthei lian eng emaw zat kawngah an táng a, lirthei lian lo chu Kawnpui-Durtlang kawngah an kal thei a ni.

Tuizêm hawng

Lunglei High Powered Committee sum cheng nuai 10 sênga Lunglei College-a tuizém siam chu nimin khan Lunglei HPC vice chairman S Laldingliana'n a hawng. S Laldingliana chuan, zirlaite leh college hmasawnna atan HPC a inhawn reng thu a sawi.

CM Shillong-ah

Chief minister Lal Thanhawla chuan nimin khan Delhi aṭangin Shillong a pan a; vawiin leh naktukah Hotel Pinewood, Shillong-ah 65th Plenary Session of North Eastern Council-ah a tel ang.

DC leh MJA

Nimin khan Serchhip MJA member-te leh district bawrhsap Dr Lalrozama chu DC pisaah an inkawm a; inpawhna ṭha zawk leh Serchhip district tana mahni kawng ṭheuha thawhnaah thawhhona
ṭha an neih theih dan turte an sawiho. Inkawmnaah hian MJA member 10 an tel a ni.

Cigarette man

Lawngtlai District Anti-Tobacco Squad leh Legal Metrology ṭangkawp chuan Thawhlehni khan Lawngtlai khaw chhunga dawr hrang hrangah dan phal loh (hriselna atana a hlauhawm tih chhin-chhiahna awm lo) cigarette Rs. 22,500 man hu vel an man.