Cheng nuai 40 tihchingpen nia hriat Chhui tura ngenna ACB la thleng lo
PRISM headquarters, Champhai chuan Champhai Kanan Venga leimin siam ṭhatna tura sum pek nuai 40 chu tihchingpen a nia an hriat avangin March 18, 2016 khan Mizoram sorkara Chief Vigilance Officer (CVO) hnenah chhui tura ngenna an thehlut. Hetih lai hian, ACB chuan CVO aṭangin chhui zui tura tihna an la dawng lo niin an sawi.
Champhai PRISM-in CVO hnena ngenna an thehluhah hian an president Dr R Lal-dinthara leh secretary Lalramzauva Ralte ten hming an ziak. Lehkhaah chuan, kum 2013-ah Champhai Kanan Vengah nasa taka lei a min thu te, kum 2015-ah Disaster Management & Rehabilitation (DMR) department-in leimin danna tur siamna leh ṭul dang atan Champhai DC hnenah cheng nuai 40 an pek thu te, sum inpek hnuah chutih laia Champhai DC chairman-na hnuaiah committeee din niin, hmalak nghal a nih thu te, cheng nuai 40 chu rei lo têah hman zawh a ni a, chu chu Champhai mipuite'n hriatthiam harsa an tih thute an ziak a ni.
Cheng nuai 40 hman dan leh leimin venna atana hna thawh dan chu Champhai PRISM-in RTI Act hmangin an zawt a; chhanna leh document pawimawh an dawnte leh mi eng emaw zat an kawm aṭangin hnathawh leh sum hman a inmil lo tih an hmuchhuak a ni. Sum tihchinpen chu Rs. 19,05,050 vel nia an hriat thu an tarlang.
Champhai PRISM hmuhchhuah ṭhenkhat
1. Lirthei hman dan Champhai DC H Laleng-mawia leh Committee Member-Secretary Lalrammawia, PHE SE-te chhinchhiah dan a inang lo. Mistiri leh labour ni khatah mi tam tak chhawr angin an ziak a, a takah Chhuanmawia leh Rorela te chiah chhawr an ni.
2. Hnahlan V/C hnen aṭang inchung atan thingzai an lei a, a leina sum sen zat Member Secretary leh Hnahlan V/C-te record a inang lo.
3. Champhai DC leh Committee Member-Secretary te aṭang document an neihah, JCB/excavator, tipper lian leh a tê an hmante chu darkar bia man chawi anga ziah a ni. Chutih laiin, JCB/excavator leh tipper-te chu Tarmat company ta, DC-in a thuneihna hmangin a pawh (requisition) a ni a; Tarmat manager-in an motor-te chu a thlawn veka an hmantir a, POL man erawh sorkarin an tumsak thu a sawi.
4. Sum hmang turin Committee member-te hriatpuina leh pawmpuina a ngai lo a, mi pali velin an duh angin an hmang mai niin an hria.
5. PRISM hruaitute'n an kawmnaah Member Secretary chuan, Member Secretary-a a awm chu a inchhîr thu te, an chhui uluk viau chuan dik lo lian tak an hmuh chhuah mai theih thu te, hnathawh chanchin chu record a nih loh avangin account vawn fel a har thute a lo hrilh. Chutih laiin, July-August 2015-a RTI Act hmanga ni tin sum chevêl an dilna chu Champhai SDO (SPIO)-in a lo pe.
6. Thil leinaah receipt leh voucher number pek vek a ni a, no. 15-ah 'PUIPUI Hardware' aṭanga cement leina chu kum 2014-a mi a ni. Chutih laiin, kum 2014-ah leimin danna siamna tur sum sanction a la awm lo a, hna thawh a la ni lo. Cement ip 80 an lakna ZORO Store-a mi chu receipt-ah a awm ve lo.
7. PRISM hruaitute'n site manager Thansanga an kawmnaah, ani chuan an hnathawh dan chhinchhiahna 'work record bu' an neih loh thu te, eng emaw chángin lehkha them-ah an chhinchhiah thute leh a chhinchhiah chinte chu Member Secretary a pek zel thu a sawi. Chutih laiin, leiminna bul hnaia awm Kanan Veng pa pakhat leh Champhaia DDK stringer pakhat chuan Site Manager-in ni tin hnathawk a vilnaah note bu a ken ziah thu an sawi thung.
Record inang lo Ṭhenkhatte
Particulars DC Office Member Secy Inan lohna
Record. Record
1. No. of loads by big trucks 2,264 651 1,613
2. No of loads by small trucks 718 1,150 432
3. Rates of big trucks Rs. 500 Rs. 1,800 Rs. 1,300
4. Rates of small trucks Rs. 300 Rs. 700 Rs. 400
5. Duration of works by JCB per hour 271 hrs 312 hrs 95 hrs
6. Last date of works by labours 17.8.2015 31.8.2015 14 days
7. Last date of works by mistiri 11.8.2015 7.8.2015 14 days
8. Last date of works by JCB 18.8.2015 17.8.2015 1 day
9. Last date of works by big trucks 18.8.2015 8.8.2015 10 days
10. Last date of works by small trucks 17.8.2015 16.8.2015 1 day