Special Blind School aṭanga HSLC leh HSSLC passed-te lawmpui

Special Blind School (SBS), Durtlang chuan nimin khan an hmunah an sikul aṭanga HSLC leh HSSLC pass tharte lawmpuina hun an hmang a, School Education minister H Rohluna'n a hmanpui.

H Rohluna chuan, SBS-in HSLC leh HSSLC examination-a hlawh-tlinna an chang chu a lawm-pui thu sawiin, "Pian---phunga rualban zawk pass zo lo tam tak an awm lai a, khawhmuh lama harsatna nei chunga SBS naupangte'n hlawh-tlin--na an chang hi a ropui hle," a ti a; SBS zirlaite hlawh-tlinna chuan Mizo ṭhalaite tan thuchah ropui tak a nih thu a sawi.

Samaritans’ Association for the Blind (SAB) in mitdelte tana a hmalakna chu fakin Education Minister chuan, "Beidawnna in a bawh khah mai turte beiseina petu in ni. Zirtirtute pawh zirnain pangngaia thawktute aia inpekna thuk zawk nen thawh ṭul a nih avangin in hnathawh hi a chhuan-awm takzet a ni. Rualban-lote hamthatna pawh a dawngtu tur dik takten an chanvo dik tak an chan theih nan sorkarin hma a la zel dawn a ni," a ti.

Khualzahawm Vanlalawmpuii Chawngthu, Mizoram Women Commission chairperson pawhin thu sawiin, SBS naupang, harsatna hrang hrang kara theihtawp chhuaha lehkha zirte hlawhtlinna chu ropui a tih thu a sawi.

Residential Special Blind School hi kum 2001-ah Samaritans’ Association for the Blind-in an din a, kuminah hian SBS aṭangin mi pahnihin HSLC an pass a, SBS Boarding aṭangin zirlai pahnihin HSSLC an pass bawk. SBS-ah hian pawl 1-10 thleng awmin, zirlai 26 leh zirtirtu 10 an awm mek a; an zirlaite zingah HSLC pass 16, HSSLC pass paruk leh BA pass pakhat an lo awm tawh a ni.