Sorkarin M/s Mizo Carbon Product tan Tanpuina cheng vbc. 3.4 a dilsak tawh

Mizoram sorkar hnuaia state level committee (SLC) chuan M/s Mizo Carbon Product, Industrial Growth Centre, Luangmual tan sorkar laipuiah ṭanpuina cheng vbc. 3.4 a dilsak tawh.

RTI Act hmanga Vanglaini zawhna Industries department-in an chhan danin, January 1, 2013 aṭanga September 30, 2014 inkar chhung khan Mizo Carbon Product, Industrial Growth Centre hian Central Capital Investment Subsidies (CCIS) atan cheng nuai 93.90 leh raw material phurh ṭanpuina Central Transport Subsidy (CTS) atan cheng vbc. 2.47 dilna District Industries Centre, Aizawlah an thehlut. Dilna hi SLC chuan ngaihtuahin, an dil zat ang hian sorkar laipuiah an dilpui a ni.

Tun dinhmunah khan Mizo Carbon Product hian Central Transport Subidies (CTS) atana cheng vbc. 10.34 dilna District Industries Centre, Aizawlah an thehlut leh tawh a, hei hi Directorate of Industries-ah enfel mek niin, SLC-ah pharh leh a ni ang.

RTI Act chhannaa a lan danin, Mizo Carbon Product hi Ravi Gulgulia leh Dr Margaret Makimi Varte te ta a ni a; breeze coke, hard coke leh LAM coke an siam ṭhin. Coke hi February 14, 2012-ah an siam ṭan a, raw material metric ton 9,046 la lut tawhin, an thil siam chhuah tawh zat chu metric ton 5492.20 a ni. An thil siam chhuahte chu Mizoram chhung leh hmarchhak state dangahte hralh a ni ṭhin.

Central YMA chuan Mizo Carbon Product chu rinhlelhawma an ngaih avangin August 14, 2014 khan Industries Minister, Parliamentary Secretary (Industries), Industries Secretary leh Industries Director hnenah chhui chiang tura ngenna an lo thehlut tawh a ni.

CYMA chuan an lehkhaah, Mizo Carbon Products-in CTS an dilnaah thil fel lo tam tak a awm ngeia an hriat thu tarlangin, "Kan ramah dikna a lal zel theih nan CYMA chuan Mizo Carbon Products chhui chiangtu tur high level committee din ṭha a ti a, thil awmzia chhui chhuah a nih hma chuan an dilna reng reng ngaihtuah zui tawh lo turin CYMA chuan a ngen che a ni," an ti.

CYMA chhui chian dan chuan, Mizo Carbon Product hian Khliehriat, Meghalaya aṭangin Luangmualah October 1 - December 31, 2012 chhungin lungalhthei metric ton 3,690 phur lut angin CTS an dilnaah an tarlang. Truck 363-in metric ton 9 zel phurin Cachar an phur thleng a, Cachar aṭangin truck 222-in IGC, Luangmual an phur thleng leh a; an phurh man zawng zawng chu Rs. 1,16,84,250 a ni.

Lungalhthei phurh nana transport company an hman an ziah lan chu Zoram Transport Company, Zemabawk a ni a, mahse Zemabawk Local Council leh YMA-te'n an vengah Zoram Transport Company an hmu zo lo. August 2013 aṭangin Zarkawtah an insawna sawi a ni. Mizo Carbon Product chuan lungalhthei an siam chhuah metric ton 321.26, Rs. 26,23,023 man chu Central Lime Industry, Lengpuiah an hralh niin an an tarlang.

CYMA-in thil fel lo nia a hriatte

1. Mizo Carbon Product HDFC Bank account no. 18148630000061 (account holder Ravi Gulgulia), Central Lime Industry HDFC Bank account no. 18148640000020 (account holder Lalremsanga) leh, Zoram Transport Company HDFC Bank account no. 18142000000626 (account holder Lalchhanhlua Pachuau)-te chu Vimal Kishore, General Manager, Mizo Carbon Product-in a buaipui vek niin HDFC Bank hotute'n an sawi. Vimal Kishore chu Safe Express Cargo, Aizawl Branch-a manager hna thawk mek a ni.

2. Mizo Carbon Product-in September 31 - December 31, 2012 chhunga diesel Rs. 1,27,447 man, Hauva Filling Station-a lei angin an insawi a, mahse Hauva Filling Station manager Pandey-a'n an lei loh thu a sawi thung.

3. Vairengtea Taxation check gate-ah lungalhthei phur truck 222-te an kaltlang ngei tih check gate inspector-te'n an certify a; Industries department official-te pawhin an certify niin a lang.