KHAWTHLIR

Thisen pe

Boston Higher Secondary School, Mission Veng chuan nimin khan an sikulah blood donation camp an huaihawt a, Aizawl Civil Hospital tan mipa 53 leh hmeichhia 15-te'n thisen unit 68 an pe.

V/C bye-election

Mara Autonomous District Council (MADC) huam chhunga V/C pathum - Saikao, Theiri leh Lotai khuaahte nimin khan bye-election neih a ni. Inthlanah hian nimin zing dar 7 aṭanga tlai dar 5 thleng vote thlakna hun hawn a ni a, vote thlak zawhah vote tlate chhiar nghal a ni.

NERP sawiho

Election Commission of India thupek angin Aizawl district chhunga electoral registration officer (ERO) leh assistant electoral registration officer (AERO)-te tan National Electoral Roll Purification (NERP) kalpui meka hmalak dan tur inhrilhhriatna nimin khan DC office-ah buatsaih a ni a, Aizawl DC Kannan Gopinathan-in a hmanpui.

CM Hawla tel

Chief minister Lal Thanhawla chu nimin khan Hotel Pinewood, Shillong-a North Eastern Council 65th Plenary Session-ah a tel a, thu a sawi. Session-ah hian Chief Minister bakah hian Mizoram sorkar mi pawimawh engemawzat an tel.

PIP thlirho

Mizoram State Health Society (MSHS) Executive Committee chu nimin khan Health secretary Lalrinliana Fanai hoin chief secretary conference hall-ah an ṭhu a; Programme Implementation Programme (PIP) an thlirho bakah, thu pawimawh hrang hrang an sawiho. PIP-te chu June 1, 2016-a National Programme Coordination Committee, New Delhi-a meeting-ah pharh a ni ang.

In kâng

May 25, 2016 chawhnu dar 2 vel khan Lunglei Zotlanga R Lalrimawia in chu a kâng a, bungrua chuh hman lohin a kâng ral. Kângmei chhuah chhan hriat a ni lo a; nimin khan khawtlangin chhawmdawl hna an thawk a ni.