Minister-in offset machine thar a hawng

Luangmual, Aizawla Printing & Stationary department hmuna 4 Hi-Web Offset Machine bun thar chu nimin khan Printing & Stationery minister C Ngunlianchunga'n a hawng.

C Ngunlianchunga chuan, kum thar aṭang chuan zirlaibu tam zawk leh Mizoram calendar pawh Printing & Stationery hmunah an chhut ve ngei a beisei tawh thu sawiin, "Mizorama tih ve theih a nih reng laia offcial zinga hnam dang chhuttir duh zawk an awm emaw tih theih a ni hi a ṭha lo hle. Department khawla chhut a nih hian a hlâwkna téltu chu sorkar a ni a, department hlâwkna pawh a awm lo," a ti.

Khawl neih ṭha ringawt a tawk lo tih sawiin Printing & Stationery Minister chuan, "Khawl kan neih ṭhat rual hian kan product a ṭhat a ngai. Kan product a ṭhat loh chuan dàwr kan hlawh thei lo ang," a ti a; thawktute chu an khawlte mahni ta ang a en a, product ṭha tak neih tum turin a chah.

Printing & Stationery principal cum project manager VL Muanchhana'n a sawi danin, Strengthenning of Govt. Press and Establishment of Printling Institute chu NLCPR-in a pawm a, chuta tan chuan cheng vbc. 8.42 ruahman a ni.

He project hnuaiah hian printing leh a kaihhnawih computer, printing, binding machine leh finishing machine chi hrang hrang 24 lei tur a ni a; 4 Hi-Web Offset Machine chu item lei tur zinga pakhat a ni. Khawl lian ber tur four colour offset Heidelber chu Germany
aṭangin India ramah chah thlen a ni tawh.