Naupang dikna chanvo zirho

SCERT chuan nimin khan an auditorium-ah sorkar middle school-a zirtirtute tan naupangte dikna chanvo leh venhimna chungchang zirhona an buatsaih.

SCERT director Laldawngliani Chawngthu chuan, The Rights of Children to Free and Compulsory Education (2009) hnuaia naupangte'n an chanvo dik tak an chan theihna atan hmalak a nih thu a sawi a, "Child right chuan naupangte hrêkbehna, hleilenna, nunràwnna hrang hrang laka chhanchhuah leh venhimna pek a tum laiin, naupangte pawh an dikna chanvo chuan mawhphurhna leh tih tur a keng tel tih hrilhhriat a ṭul," a ti.

Laldawngliani Chawngthu chuan, zirtirtute chu naupang lian zawk leh chak zawkte'n an aia naute leh chak lo zawkte an tihduhdah lohna tura hma la turin a fuih.

Zirhonaah hian The Rights of Children to Free and Compulsory Education (RTE), Child Rights and its Educational Implications, Behaviour Modifications, Childline, Gender Issues leh Personal Safety Rules for Children-te zirho a ni a; vawiinah chhunzawm a ni ang. Hetiang programme hi sorkar primary school zirtirtute tan May 23-24, 2016 chhungin nei a ni tawh bawk.