Lei chim sorkar inthlahdah vangah ngai

MNF general headquarters office bearer-te chu ni-min khan Mizo Hnam Rûnah an president Zoramthanga kaihhruaiin an ṭhukhawm a; resolution pass-in, Congress sorkar chhunga lei chim tam lutuk chu pawi an tih thu pali leh sorkar inthlahdah leh chak loh vanga thleng nia an ngaih thu an tarang.

MNF resolution chuan, "Lei chim ṭhin vanga mipuite tawrhna nasa tak thleng leh sorkar sum tam tak hloh a ni ṭhin hi pawi kan ti tak zet. Heng leite hi rang leh chak taka dawh ṭha leh vat turin sorkar kan phût a, tuna lei eng emaw zat chim leh mai hlauhawma awm mekte pawh siamṭha vat turin sorkar kan phût bawk," a ti.

Congress sorkarin Mynamar vawk a lak luh aṭanga vawk pûl hri PRRS lêng mekah vawk 2600 chuang an thi tawh chu pawi an tih thu sawiin, MNF chuan, "PRRS hi rang taka titawp tura hma la turin sorkar kan phût," an ti a; PRRS vanga vawk vulh chántute hnenah zangnadawmna an phû tâwk pe tura sorkar an phût thu an tarlang.

MNF chuan, Central YMA-in Mizoram pum huapa Remna Ni lawmna buatsaih a tum chu lawmawm an tih thu sawiin, hlim taka hmang turin Mizoram mipuite duhsakna an hlan a; May 19, 2016-a Mizoram hmar lam khaw 31-a V/C thlanah MNF-in khaw pariat leh a hnuah khaw pathum dang, a vaiin khaw 11-a sorkar an siam thei chu lawmawm an tih thu an sawi bawk.