Thla 2 chhungin vawk 2,951 thi tawh

Kumin April leh May thla, nimin chawhma lam thleng khan Mizoram pumah vawk 2,951 a thi tawh a, chu'ngte chu Porcine Reproductive and Respiratory Syndrome (PRRS) vanga thi nia hriat a ni. Mizoram sorkar chuan, state pawn aṭanga ran lak luh a khap bakah, Mizoram chhunga district sanga vawk lak luh a khap tawh.

Vanglaini palai zawhna chhangin Animal Husbandry & Veterinary director Dr Saingura Sailo chuan, tun hnaia PRRS lêng avangin Mizoramah April thla aṭangin vawk thi a awm ṭan a, April leh May thla chhungin vawk 2,951 an thi tawh tih a sawi.

AH&Vety Director sawi danin, kumin April leh May thla chhunga vawk thih tawh dan chu - Champhai district-ah vawk 2,652, Lunglei district-ah vawk 221, Lawngtlai district-ah vawk 50 leh Serchhip district-ah vawk 28 a ni. Hetih lai hian, Aizawl, Saiha, Kolasib leh Mamit district-ahte chuan PRRS vanga vawk thi an hre rih lo.

Dr Saingura Sailo chuan, PRRS vanga vawk thi chu a tlahniam tawh hle tih sawiin, "Reh lam a pan a, tun karah chuan thi an awm mang tawh lo a, tlemte chauh an thi tawh," a ti a; Lunglei leh Lawngtlai district-ah phei chuan tun karah thi an la awm loh thu a sawi.

Mizorama vawk thite chu an tisa leh thisen endik turin sample lak a nih thu sawiin, Dr Saingura chuan, "Keini pawhin kan endik a, a result pawh kan hre tawh. Bhopal lama sample kan thawn erawh chu a result kan la hre lo," a ti.

Mizorama vawk thite endik aṭang-in vawk thih chhan chu PRRS vang a ni tih an finfiah tawha thu dawn a ni.