Remna Ni hman dan tur sawiho

Nimin khan Central YMA Committee Room-ah CYMA hruaitute leh YMA sub-headquarters leh group hruaitute an ṭhukhawm a; June 30-a Remna Ni inang tlanga hman dan tur an sawiho. Mizoram hmun hrang hranga YMA sub-headquarters leh group hruai-tu 45 an tel.

Meeting chuan, Remna Ni pualin Mizoram pumah remna leh muanna hlutzia uar taka tarlan ni se, an ti a; sorkar, tlawmngai pawl, political party leh kohhrante nen lungrual taka Remna Ni hman a nih theih nan YMA sub-headquarters leh group-ahte ruahmanna siam ni se, tiin an rel.

Aizawla Remna Ni lawm--naa khuallian turin prime minister Narendra Modi sawm an lo rel tawh a, Prime Minister chu an dàwr mek nia thu dawn a ni.

Remna Ni atana kaihhruaina siam Ṭhenkhatte

YMA Sub-Hqrs. leh Group tan

1. Mipui náwlpui a tam thei ang ber an tel theih nan ruahmanna siam ni se.

2. Party inchirhthehna lam hawi a awm loh nan boruak ṭha tak siam ni se.

3. Remna hlutzia mipuite hriat tura puanzar ni se.

4. Ṭhangtharteah remna leh muanna hlutzia uar taka hrilhhriat ni se.

5. Remna leh muanna Mizoramah a awm zel theih nan mipuite'n ṭan an lak a ṭulzia tarlan ni se.

6. Thupui atan 'Remna - mi tin tan' tih ni se.

7. Ramna Ni lawmnaah YMA (Central/Sub-Hqrs/Group) kaihhruainain Organising Committee din ni se; sorkar, kohhran, NGO leh political party aiawhte telh ni se. (Saiha leh Lawngtlai district-ah chuan CYLA leh MTP kaihhruaina hnuaiah Organising Committee din ni se.)

8. Banner siam ni se, Remna Ni logo leh thupui târlan ni se.

9. Sum mamawh dan azirin sponsorship-te pawh mahni remchan dan anga zawn ni se.

10. Remna Ni pualin flag siam ni se, a lawmna inkhawmah pawh pharh ni se. Flag hi state level Organising Committee-in an buaipui ang.

11. Khaw malin an lawm dawn a nih chuan guideline zûlzui hian ruahmanna siam ni se.

Programme atana kaihhruaina

1. Ṭan hun inrual tlang - chawhma dar 11:00 ni se.

2. Ṭanna hla atan 'Ro min rel sak ang che' tih hla zaipawl hruainaa sak ni se.

3. Hunserh kohhran hruaitu aṭanga inruat ni se.

4. Thuchham rual - Remna leh muanna lam hawi thu chham rual ni se. (Thu chham tur chu state level Organising Committee-in a ruahman a ang.)

5. Political party aiawhte minute 5 ṭheuh thu sawina hun pek ni se.

6. Sorkar aiawh (DC/SDO(C)/BDO etc.) minute 10 ṭheuh hun pek ni se.

7. Organising Committee-in ṭul a tih angin khuallian ruat se.

8. Mahni remchan danin programme hi belh theih a ni ang.