Zu zawrh titawp tum loah MNF puh

ZNP chuan thuchhuah siamin, MNF party chu Mizorama zu zawrh titawp tum tak tak loah an puh.

ZNP chuan, May 24, 2016-a Mizoram University auditorium-a ‘Varsity Platform 2016’ buatsaihah MZU zirlaite'n zu zawrh an titawp dawn em tih an zawhna chu MNF aiawh Lalchhandama Ralte chuan, 'Kohhran leh NGO-te nena inráwna a ṭha ber turin kan kalpui ang,' tiin a chhang niin an sawi a, "Hei hian zu zawrh tihtawp an tum tak tak lohzia a tichiangah kan ngai," an ti.

ZNP chuan, MNF chu zu zawrh duh loh vanga kawng zawh a, poster-te tár a, zu zawrh phalna permit titawp tura insawi an nih laiin, "MNF hi Mizorama political party zinga zu zuar hmasa ber an ni. Zu zawrh phalna tihtawp tumna tak tak nei si loa ram leh hnam tana thil ṭha ngaihtuahna nei loa vote zawn nan chauha hmangah kan ngai," an ti a; MNF chu ram rorelnaa tel tlak loa an ngaih thu an tarlang.