


Lok Sabha MP atan ZPM candidate Richard Vanlalhmangaiha thlan a ni; Vote 68,288-in amah hnaih bertu a hneh

Kumin April 19 aṭanga June 1 thlenga Lok Sabha inthlanpuia vote tlate chu nimin khan India ram pumah chhiar a ni a; Mizoram MP atan ZPM candidate Richard Vanlalhmangaiha thlan tlin niin, amah hnaih bertu MNF candidate chu vote 68,288-in a hneh.
Lok Sabha inthlanpuiah hian Mizoramah chuan April 19-ah vote thlak a ni a, vote tlate chu nimin zing dar 8 aṭangin chhiar ṭan a ni. Aizawl district-a postal ballot hmanga vote tlate chu Aizawl DC Office-ah chhiar a ni a, electronic voting machine (EVM)-a vote tlate chu Aizawl College, Assembly Annexe leh DC Office-ahte chhiar a ni. District tinah an huam chhunga vote tlate chhiar a ni bawk.
Vote chhiar lai hian EVM chiang lo tlem azawng awm mah se, harsatna lian tham thleng a awm lo a, chhun dar 12 velah result tlangpui hriat theih a ni tawh. Official-a tihfel ngaite tihfel a nih hnuah Richard Vanlalhmangaiha hnenah returning officer Nazuk Kumar, Aizawl DC chuan MP atan thlan tlin a ni tih lantirna certificate a hlan.

Election department tarlan danin, ZPM candidate Richard Vanlalhmangaiha hian vote 2,08,552 hmuin, vote tla zawng zawng 4,91,336 aṭangin 42.45% a hmu a, amah hnai bertu MNF candidate K Vanlalvena'n vote 1,40,264 (28.54%) a hmu thung a; an inthlauhna hi vote 68,288 a ni.
Candidate dangte vote hmuh dan chu - INC candidate Lalbiakzama'n vote 98,595 (20.07%), BJP candidate Vanlalhmuaka'n 33,533 (6.82%), independent candidate Lalhriatrenga Chhangte-in vote 4,706 (0.96%) leh PC candidate Rita Malsawmi'n vote 3,793 (0.77%) an hmu. NOTA-ah vote 1,893 (0.38%) a tla bawk.
Lok Sabha MP atana thlan tlin tâk Richard Vanlalhmangaiha s/o Wg.Cdr Lalzawma hi kum 1978 khan Gorakhpur, Uttar Pradesh-ah a piang a, zirnaah B.Com. a ni. MAMCO-ah assistant manager a ni ṭhin a, kum 2015 khan early retirement-in a chawl a, kutkawih eizawnna lam a luhchilh. Tunah hian an chhungkuain Venghlui, Aizawlah an chêng mek a ni.
