Melthuma leiminin a hnâwl zinga hmeichhe naupang ruang hmuh belh

May 28, 2024 zinga Melthum leh Hlimen inrìna bula leiminin in a hnâwla mihring a hnâwl tel zinga mi Deborah Lallawmawmi (11) d/o R Lalmuanzova, Hlimen ruang chu nimin khan lak chhuah a ni. Heti hian May 28-a leiminin a hnawl vanga thi mi 34 zinga mi 30 hmuh an ni tawh a, mi pali hmuh an la ni lo.

Central YMA president hlui R Lalngheta, Hlimen hnen aṭanga thu dawn danin, nimin chawhnu lam khan leiminin in a hnâwlna hmunah Deborah-i hi hmuh a ni a, nimin tlai dar 5:58 khan lâk chhuah a ni. Heti hian Melthuma leiminin in pali a hnâwla thi mi 19 zinga mi 16 chu hmuh a ni ta a, hmuh loh pathum an la awm.

Leiminin mihring a hnâwl telte khawtlang huapa zawn chu May 3, Thawhṭanni tlai khan tihtawp ni mah se, mi ṭhahnem ngaite'n an la zawng zui zel. Melthum leiminah hian Melthum mi pathum - Lalṭhakima (42) s/o Lalhlira (L), Lalremtluanga fate pahnih Lalvenhima (8) leh Ramdinsanga (thla 6)-te hmuh an la ni lo a; Matthew Lalchhanhima (34) s/o Lalbiakzauva, Aibawk hmuh a la ni lo bawk.

Nimin vek khan Serlui Lungleng kaiah mipa ruang chhar a ni a, May 28 veka Hlimen leiminin a hnâwl zinga hnam dang pakhat a nia ngaih a ni. Hnam dang pakhat hi a hmain a bawp chauh hmuh a lo ni tawh a ni.