Parliament-ah zawmpui nei loin, issue base-in kan kal dawn - Richard

Mizoram Lok Sabha MP atana thlan tlin thar Richard Vanlalhmangaiha chuan nimin khan Aizawl DC office-a media centre-ah thuthar thehdarhtute a kâwm a; Lok Sabha (Parliament)-ah zawmpui nei loin, thil awm dan azir (issue base)-a an kal dawn thu a sawi.

Richard Vanlal­hma­­­ngaiha chuan, "Parlia­ment-ah NDA emaw, INDIA-ah emaw ka ṭhu dawn lo a, kan party-in kan kal zel dan tur chu a la rel dawn a, issue base-in kan kal chho dawn," a ti a; thawhpui nei lo (non-alliance) an nih angin Lok Sabha Speaker-in a ṭhutna tur chu a kawhhmuh mai tur thu a sawi a ni.

Pathian awmpuina an dawn avangin MP atan thlan tlin a ni tih sawiin Richard-a chuan, "Mizo mipui zawng zawng chungah lawmthu ka sawi a, mi rilru tihnat ka neih chuan ngaihdam ka dil. Zoram mipuiin hnathawh kawr min hâktir a, kan Chief Minister, minister-te leh party hruaitute kaih­hruaina hnuaiah kan ramin hma a sawn zel theih nan state sorkar nen thawkhoin theihtawpin central-ah ka ṭang dawn," a ti.

Richard Vanlalhma­ngaiha chuan, nikuma MLA inthlanpuiah ZPM party an chak a, chief minister Lalduhoma kaihhruai sorkarah mipui an lawm nia sawiin, chu chu MP inthlanah mipuiin vote hmangin an lantir nia a hriat thu a sawi bawk.