Sorkar hnathawk hlawh a hun taka pek zel kan duh - Chief Minister

Sorkar hnathawk pawl hrang hrang intèl khawmna, Federation of Mizoram Government Employee & Workers hruaitute chuan nimin khan chief minister Lalduhoma a pisaah an hmu a; Chief Minister chuan, sorkar hnathawk hlawh chu a hun taka pek zel an duh tih a lo hrilh.

FMGEW hruaitute chuan, sorkarin hlawh a pek chhuah hma tâk avanga an lawm thu an hrilh a; dearness allowance tihpun an dilna leh Ainawn Venga FMGEW Housing Complex atana hmalak meknaa an harsatnate an thlen. CM Relief Fund atan Rs 1,00,000 an hlan nghal a ni.

CM Lalduhoma chuan, sorkar hnathawk hlawh chu a hun taka pek zel an duh tih a sawi a, "Nimahsela, kan pe reng thei che u ang em tih kan sawi lâwk thei bik lo. Sum leh pai dinhmun ṭha neih tumin theihtawp kan chhuah reng a ni," a ti. FMGEW-in Housing Complex an kalpui meka an harsatnate chu a ṭul anga a lo bawhzui tur thu a sawi bawk.