Sumdawng lian tlawn theiha awm lo turin CM-in Mizoram MP tur Richard-a a chah

ZPM party chuan nimin khan an pisaah Lok Sabha MP atana ZPM candidate Richard Vanlalhmangaiha thlan tlin a nih lawmna inkhawm an buatsaih a; chief minister Lalduhoma chuan, Richard Vanlalhmangaiha chu vai sumdawng lian leh thil ti theite tlawn theiha awm lo turin a chah.

Lalduhoma chuan, Richard Vanlal-hmangaiha chu Mizoramin Lok Sabha MP a neih pakuana a nih thu sawiin, "Kan ram tan hna ṭha taka a thawh theih ka beisei tlat," a ti a; vai sumdawng lian leh thil ti theite tlawn theiha awm lo turin a chah a ni.

MP thlana chakna petu Pathian leh mipui chungah an lawm tak zet thu sawiin Duhoma chuan, "MP inthlan result hian party tinte dinhmun a pho lang chiang hlein ka hria. ZPM hmasawnna ropui tak pawh hmuh theihin a lang a, MLA bial 40-a bial 37-ah hnehna kan chang hi lawmawm kan ti hle a, MLA inthlana kan tlin lohna bial 10-a hnehna kan chang ta hi kan lawm tak zet a ni," a ti.

Lalduhoma chuan, ZPM chu Pathianin a thlahthlam lo a, Pathian lung an tihawi zel chuan an chak zel a rin thu sawiin, "Model Code of Conduct zo se, sorkarin chak leh zualin hma a la thei tawh dawn a, hna thawhna hun kan la neih tam loh avangin kan la siamṭha duak duak thei bik lo a, mahse, ni tinin he ram siamṭha tura hmalakna a kal chho reng a ni," a ti a; party ṭhenkhat aṭanga sawiselna an dawnte chu an haw lo a, insiamṭhat nan hman zel an tum thu a sawi.

MP atana thlan tlin tâk Richard Vanlalhmangaiha chuan, thlan tlin a ni chu a mimal hlawhtlinna leh party bil hlawhtlinna a ni lo tih sawiin, "He ram mipui, ka thawhsak turte tana hlawhtlinna a ni. Kan CM kaihruainain hna kan thawk chho dawn a, ka phûr tawh tak zet a, min beisei angin ka theihna sang ber ka chhuah dawn a ni," a ti.

Richard Vanlalhmangaiha chuan, an chak theihna tura theihtawp chhuahtu te, media mi te, ZPM party mi te, sorkar official te, Election hotute leh Pathian chungah a lawmthu a sawi bawk.