Zirlai hmeichhia ti ṭhate chawimawi

Women & Child Development (WCD) department chuan nimin khan kumin HSLC leh HSSLC-a zirlai hmeichhia ti ṭhate chawimawina an buatsaih a, Social Welfare minister Lalrinpuii'n a hmanpui.

Inkhawmah hian HSLC 2024-a top 10-a lang hmeichhia pariat leh HSSLC 2024-a top 10-a lang hmeichhia 18-te hnenah Minister-in lawmpuina thuchei leh pawisa (incentive cash award) a hlan a; Mission Shakti hnuaia anganwadi-a hman tur Mizo ṭawnga number chhiar zirna leh thil dangte animated video siamte a tlangzarh bawk.

Minister Lalrinpuii chuan, Mizote'n lehkha an zir nasa tâwk lo ṭhin tih sawiin, "Tunah chuan kan ṭhangharh chho zel a, kan ṭhanharh lehzual a ngai," a ti a, nasa lehzuala zirnaa ṭan la turin zirlaite a fuih.

Social Welfare chuan, civil service-te chu hna zahawm a nih thu sawiin, "Central service-ah Mizo kan nei tlem tawh em em a, technical lam ti tlurh lo deuh a, central service lamte zirlaite'n an tum chhoh zel a ṭul," a ti a; hlawhtling turin Pathian ṭih a pawimawh sawiin, zirlaite chu lehkha an zirnaah Pathian hnena inhlan hmasa ṭhin turin a chah.

Chawimawina inkhawm hi Social Welfare secretary Sangchhin Chinzah-in a kaihruai a, Women & Child Development director Zoramthangi Chhangte pawhin thu a sawi a ni.