MP thlan leh vote chhiar chungchangah Political party-te'n lawmthu an sawi

Lok Sabha inthlanpui result puan tak chungchangah political party hrang hrangte chuan thu­chhuah an siam a, an party candi­date vote-tute chungah an lawm thu leh MP atana thlan tlin tâk an lawmpui thu an tarlang.

MNF party chuan, MP atana thlan tlin tak, ZPM candidate Richard Valalhmangaiha an lawm­pui thu sawiin, "A kal zelna turah Mizoram, hnam leh kan sakhaw hum­him nana chak taka thawk tur leh India ram rorelna sang ber Parliament House-ah pawh huaisen taka au a, theihtawp chhuaha hna thawk turin duhsakna kan hlan," an ti.

MNF chuan, an candidate K Vanlalvena a tling zo ta lo chu pawi an tih thu an sawi rualin, amah vote-tute chungah an lawm thu an tarlang a, "Kan ram, kan hnam leh kan sakhaw humhim nana huaisen taka theihtawp a chhuah tawhnate avanga a hna chhunzawm tura duhsak taka thlangtu zawng zawng leh atana theihtawp chhuahtu zawng zawng chungah thinlung takin lawmthu kan sawi," an ti a; inthlan leh vote chhiar buaipuitu zawng zawng chungah an lawm thu an tarlang bawk.

ZPM Ṭhalai chuan thuchhuah siamin, ZPM candidate thlan tlin a nih theihna tura theihtawp chhuahtute chungah an lawm thu an sawi a, "ZPM official candidate Pu Richard Vanlalhmangaiha hneh taka thlan tlin a ni ta hi lawmawm kan ti a, kan lawmpuiin, Mizoram aiawha a hnathawhna turah duhsakna sang ber kan hlan," an ti.

MP inthlan a hlawhtlin theihna tura candidate zawng zawng leh inthlan buaipuitute zawng zawng bakah, vote thlaktu zawng zawng chungah an lawm thu ZPM ṭhalaite chuan an tarlang bawk.

PC Party chuan, an candidate Rita Malsawmi vote-tute chungah an lawm thu an tarlang a, "Thinlung takin lawmthu kan sawi a, duhsak taka min vote-tute in beiseina kan thlenpui phâk lo erawh pawi kan ti tak zet," an ti a; thlan tlin tak Richard Vanlalhmangaiha an lawmpui thu leh ram leh hnam tana theih­tawp chhuah tura an duhsak thu an tarlang.