Speaker bangla kawta thing kih a nih avangin hma la turin DFO an ngen
Mizoram Legislative Assembly Speaker bungalow (bangla)-a thing chu tun hnai khan kih a ni. Thing kih a nih chungchangah hian Centre for Environment and Social Justice (CESJ), Mizoram chuan hma la turin Aizawl District Forest Officer (DFO) an ngen.
Assembly Speaker bangla kawta thing kih chungchangah hian CESJ chuan nimin khan Aizawl DFO hnenah hma la tura ngenna an thehlut a; DFO hmalakna an hmuh loh chuan court-ah PIL thehluh an tum thu an tarlang.
CESJ chuan, tunlaiah environment pawimawhzia leh thing leh mau humhalh pawimawhna nasa taka inzirtir a nih lai leh, mipuiin ramngaw pawimawhzia an hriat thar mek thu sawiin, "A humhalh leh venhim kawnga uar zawka hma la tur ber sorkarin, sorkar hmun pawimawh laia thing an kihtir mai hi CESJ chuan dan palzûtna leh dan zawm lohna lian takah kan ngai," an ti.
Mihring tana hnawksak leh hlauhawm thing a awm theih thu te, Mizoram sorkarin thing kih dan tur a duan thu te, forest land leh non-forest land-a thing kih dan tur te, municipal area-a thing kih theih dante a awm thute CESJ chuan an tarlang.
CESJ chuan, Speaker bangla kawta thing kih chu dan bawhchhiatnaa an ngaih thu leh, sawi mâm tum chia an ngaih loh thu an sawi a, "Dan bawhchhiatna thlenna hmun hi dan siamtute zingah pawh Speaker quarter kawt a ni lehzel hi dan pawisak lohna lian takah kan ngai," an ti.