Mass Rally on Clean Air buatsaih

Mizoram Pollution Control Board (MPCB) chuan World Environment Day (June 5) pualin nimin zing khan Aizawlah Mass Rally on Clean Air an buatsaih a, rally-a tel mi 300 velin kawngpui dunga bawlhhlawhte an chhar fai nghal.

Mass Rally on Clean Air hi hmun hnih - Sikulpuikawn leh Chanmari kâwn aṭangin ṭan a ni a, Vanapa Hall kawtah intâwk khawmin, inkhawm tawi buatsaih a ni. MPCB office-a thawkte bakah sikul leh college ṭhenkhata eco-club member-te an tel a; kawngpui dung leh tawihâwk luankawra bawlhhlawh awmte an chhar fai nghal a ni.

Vanapa Hall kawta inkhawm tâwiah MPCB scientist-C Dr Lalramnghaki Pachuau chuan, kumina World Environment Day thupui chu 'Land restoration, desertification and draught resilience’ tih a nih thu sawiin, Mizoram leilung chhe mek siamṭhat leh a chhe zel tur ven chu mi tin mawh a nih thu.

Dr Lalramnghaki Pachuau chuan, Mizoramah ram chhia leh ram bua tam tak a awm tawh thu sawiin, ṭhenkhat chu khuarêl chhiatna vanga awm a nih laiin, a tam zawk chu mihring kutthlak vanga awm a nih thu a sawi bawk.

Inkhawmah hian Rally-a telte chu nunphung thlâk danglam ngaite thlâk danglam a, environment humhim tura ke pên zel turin thutiam an sawi rual a ni.