KHAWTHLIR

CM kâwm

Chief minister Lalduhoma chu nimin khan a pisaah Income Tax principal chief commissioner (North East) Chaitali Panmei leh a thawhpuite'n an kâwm a; Income Tax-in hmalak an tum dan te, Mizoram sorkar thawhpuina an mamawh thute an hrilh. Chief Minister chuan Mizoramah income tax pe eng emaw zat an awm thu sawiin, Silchar-ah lehkha tifel tura an kal a ngaih ṭhin thu a sawi a; Aizawlah Income Tax-in office hawng ve se ṭha a tih thu a sawi a ni.

Chhawmdawlna pe

Aizawl Phulpui Insuihkhawm (API) chuan tun hnaia Cyclone Remal vanga Phulpui khuaa chhiatna tawkte chhawmdawlna atan June 3, Thawhṭanni khan Phulpui VC hnenah Rs 1,45,500 an hlân. Phulpuiah hian leiminin in pathum a hnâwl bakah in dang chhia a awm nual a, damdawi-in panpui ngai khawpa hliam mi pahnih an awm. Chhiat tâwkte ṭanpuina atan API chuan an member-teah vehbûr an khawn a ni.

EFCI din champha

Evangelical Free Church of India (EFCI) kohhrante chuan June 3, Thawhṭanni khan an kohhran kum 52 tlin champha hmun hrang hrangah an lawm. EFCI hian Shillong-ah hmunpui an nei a, Mizoramah chuan Ramhlun Venglaiah Regional Headquarters an nei. Kum 2023-a inchhiarna angin member 51,893, biak-in 321, pastor thawk lai 102, kohhran upa 366, missionary 186 leh partner missionary 12 an nei mek a ni.

LC sorkar inthlak

Aizawl Municipal Corporation chuan, Chanmari West-ah ZPM party kaihhruai Local Council a pian thu May 3, Thawhṭanni khan hriattirna chhuahin a puang. Chanmari West LC-ah hian MNF sorkar a ding ṭhin a, MNF member pahnih leh Congress member pakhatte'n May 28, 2024 khan ZPM an zawm avang leh Congress member pakhatin a thlàwp avangin ZPM LC apiang a ni.

In sak belh hawng

Hunthar Primary School zauhna atana sak belh chu nimin khan School Education director Lalsangliana'n a hawng. Sikul zauhna atan hian bialtu MLA K Sapdanga'n a MLA fund aṭangin Rs 5,00,000 a pe a ni.