Synod hotute leh MLA-te an inkâwm; Synod-in hleih nei loa rorel turin a ngen

Mizoram Synod bultumin Synod Executive Committee (SEC) member-te leh Legislative Assembly member (MLA)-te nimin khan Synod Office-a JM Lloyd Hall-ah an inkâwm a, Synod hruaitute'n Mizoram sorkar leh ram roreltutea an beiseite hrilhin, hleih nei loa rorel tur leh corruption (eirukna/hlemhletna) tibo tura an beisei thu an sawi.

Inkawmhona hi Synod moderator Rev. R Vanlalnghaka'n a kaihruai a; inhmelhriattirna leh inlawmna hun hmangtu Synod senior executive secretary Rev. C Zorammawia chuan, Mizoram inthlanpui neih a nih a, sorkar thar a pian apiangin Mizoram Synod-in MLA-te leh SEC-te inkawmhona a buatsaih ṭhin thu a sawi a, "Hun duhawm tak kan hmangho thei hi kan lawm hle a ni," a ti. Synod-in MLA-te chu Holy Bible an pe vek a ni.

Synod aiawhin secretary Rev. PB Mankima'n thu sawiin, ram rorelna chu Pathian rawngbawlna pawimawh a nih avangin ram hruaitute chu thawhpui an inpeih reng thu a sawi a, "In tan kan ṭawngṭai ṭhin. Taksa lama mipui mamawh thlentute in ni a, keini hi thlarau lama an mamawh enkawlin kan awm. Taksa leh thlarau hi sawi hran theih ni mah se, ṭhen hran hleih theih loh a ni a, kan thawhho ṭhat a ṭul a ni," a ti.

Synod Secretary hian Mizoram Synod-in sorkara thu an thlente a chhiar chhuak a, chu'ngte chu a hnuaia mite hi a ni.

1. Hleih nei loa rorel turin

2. Corruption tibo turin

3. Dan hmanga rorelna kengkawh turin

4. Chanchin ṭha leh sakhua venhim

5. Kan ram zirna siamṭha tura thawhho

6. Ram hmasawnna tura ṭan la turin

7. Ram leilung insem rual tura ṭan la turin

8. Zu leh ruihhlo tirêm tura ṭan la turin

9. Sumdawnna ṭha lo tibo tura hma la turin

10. Fa nei tam tura hma la turin

11. Hriselna kawnga nasa lehzuala ṭan la turin

12. Thing leh mau leh nungchate humhalh

13. Mizo ṭawng humhalh tura ṭan lak, 8th Schedule-a Mizoram telh a nih theih nana hmalak

14. Ramri chin siam fela humhalh

15. State dang nena inkalpawhna ṭha neih

16. Thutiama rinawm tur

17. Tihhlawhtlin theih loh tur thila mipui hmaa intiamna nei lo turin

Chief minister Lalduhoma'n thu sawiin, sorkarin kohhran leh tlawmngai pawlte nen thawhhona ṭha tak neih an duh thu a sawi a; duhsak bik nei loa kal a, mipui sorkar siam an tum thu sawiin, "Eirukna leh hlemhletna titlem turin Project Monitoring Committee chak takin an kal mek. Endik tur a tam avangin hun rei lo te chhungin kan endik vek séng dawn lo a, kohhran pawhin ṭul in tih hi rawn thlen ṭhin u la a ṭha hle ang," a ti.

Zirna lamah sorkar chu kohhran nena innghênga kal an duh tih sawiin Lalduhoma chuan, "PPP (public provate partnership) mode-a kal dan tur kan dap mek," a ti a; ram leilung sem rual thuah Progressive Tax system hmanga vên theih a nih an beisei thu te, Mizoram pum LSC hmanga cover vek a ṭha an ti a, chumi tura thawktu indaih lohna chu outsource an tum thu a sawi.

Chief Minister chuan, zu leh ruihhlo chungchangah kohhran hrang hrang ṭhalaite nen an sawiho tawh tih sawiin, "Core Committee kan din thar a, a kal dan pawh kan tidanglam hlek. Cheng vbc. 3 hmanga chêt lâk ṭan kan tum mek a, hnathawh tichak turin dan pawh siamrem kan tum," a ti.

CM Lalduhoma chuan, "Mizoramah Pathian ram thlentir kan duh. Kohhran nen hian project inṭâwm kan ngah em em a ni," tiin, ram leh hnam tan leh, chanchin ṭha atan thawhhopuiah kohhrante a sàwm a, ṭawngṭaipui ṭhin turin a ngen bawk.

Assembly speaker Lalbiakzama chuan, sorkar leh ram hmangaihtu kohhran an neih avangin an vanneih thu sawiin, "Thuràwn kan mamawh a, zilh kan ngaihna a awm a, inzir zel mamawh kan ni. A ṭulna apiangah inpui tawn zel ang u," a ti a; MLA zingah state pawna zin mek leh damsam lote an awm avang leh, chhiat tawhna thil avangtein inkawmhonaah an tel kim theih loh thu a sawi.

Inkawmhonaah hian deputy speaker Lalfamkima'n MLA-te hmelhriattirna hun a hmang a, Rev. C Lalsangliana'n MLA-te tana malsawm ṭawngṭaina hun a hmang. MLA dang - opposition leader Lalchhan-dama Ralte, C Ngunlianchunga leh B Lalchhanzova te pawhin thu an sawi a ni.