Mizoram MP-ah INC tling ngun ber; Ruling party vawi 12 an tling tawh

Mizoram chu January 21, 1972-a union territory-ah dah a ni a, chuta ṭang chuan Mizoramah Lok Sabha inthlan (vote thlak lohte telin) vawi 14 neih a ni tawh. Indian National Congress (INC) candidate vawi ruk tling tawhin, party mala tling ngun ber an ni a; state sorkara ruling party ṭum 12 an tling tawh.

Mizoramin kum 1972-a UT a nih hnua Lok Sabha inthlan hmasa ber chu India rama inthlanpui vawi ngana a ni a, hemi kum hian Lok Sabha MP atan Mizo Union party mi Sangliana thlan ni mah se, vote thlâk a ni lo. Sangliana hi Mizoram aṭanga MP hmasa ber a ni.

Kum 1984-a Lok Sabha general election-ah INC candidate Lalduhoma chu chuhtu awm loin a lo ting tawh bawk a; hemi ṭum hian chuh tuma hming pe mi dang pahnih chu document fel lo vangin hnâwl an ni a, Lalduhoma chiah candidate awm ta a ni.

Mizorama ṭum 14 Lok Sabha inthlanpui awm tawh zinga ṭum 12-ah state-a ruling party candidate thlan tlin an ni a, ṭum hnih chu state sorkara ruling party ni lo candidate thlan tlin an ni thung.

INC-in ṭum ruk Lok Sabha-ah MP nei tawhin, MNF-in ṭum hnih an nei tawh a, ZPM-in a vawi khat nan kumin aṭangin MP an nei dawn. Ṭum thum chu independent candidate thlan tlin an lo ni tawh bawk.