World Environment Day hman a ni
Nimin June 5 kha World Environment Day a ni a, Mizoram hmun hrang hrangah hman a ni. Kumin World Environment Day thupui chu 'Land restoration, desertification and drought resilience' tih a ni.
World Environment Day hi Environment Forest & Climate Change (EFCC) department huaihawtin St Paul's Higher Secondary School-ah hman a ni a, principal chief conservator of forest (PCCF) AK Biswal-a'n a hmanpui. PCCF bakah, Aizawl DFO Lalnunsanga Khawlhring, Aizawl College principal Lalbiak-zuala, Save Tlawng River leh SEL Foundation aiawhte'n thu an sawi.
Aizawl College Principal chuan Save Tlawng River hnenah SEL Foundation Award a hlan a, award hian thuchei leh Rs 50,000 a keng. Day hmannaa telte'n World Environment Day thutiam an sawi rual bawk.
Mizoram Pollution Control Board (MPCB) chuan Chanmari YMA Hall-ah World Environment Day an hmang a, Rebec Lalhruaimawii’n kaihruaiin, MPCB chairman Liankima Lailung-in a hmanpui.
MPCB Chairman chuan, leilungte uluk lehzuala enkawl a ngaih thu sawiin, "Tui leh boruak thianghlim tam zawk kan neih theihna tur a ni a, ngaihtuahna thar púin, tunah hian bul kan ṭan nghal a ngai. Kan khawvel lo hi mihringte'n chênna tur khawvel dang kan nei lo a, leilung leh tui leh boruakte kan enkawl ṭhat a pawimawhzia kan hriat thar a ngai," a ti.
MPCB huaihawt inkhawmah hian Mizoram Environmental NGOs Coordination Committee (MENCO) general secretary Vanlalhrima’n leilung leh a chunga awmte humhalh pawimawhzia a sawifiah a; Benjamin Lalnunsanga Colney-in kumin World Environment Day puala MPCB hmalaknate a sawi bawk.
Champhaiah chuan District Education Office leh MPCB bultumin 'Boruak thianghlim' (clean air) tih thupui hmangin Champhai Vengsang aṭanga Circuit House thleng kawng zawh a ni a; Vengsang, Vengthlang leh Bethel kâwnahte photo booth/banner dah niin, thla lâkpuitute tan portal-a upload zel tura ruahman a ni.
Hnahthialah pawh World Environment Day pualin Samagra Shiksha leh MPCB ṭang dunin chuan Hnahthial Horeb Lodge conference hall-ah hun an hmang a; leilung leh a chhunga awmte venhim leh humhalh a pawimawhzia inzirtir a nih bakah, Hnahthial District Inter School Eco Club buatsaih Waste to Art Exibition intihsiak lawmman sem a ni.
Assam Rifles pawhin nimin khan Meri Life Initiative hnuaiah Aizawl, Lunglei, Siaha leh Champhaiahte World Environment Day an hmang a, zirlaite nen thing an phun. Mizoram hmun palia hun an hmannaah hian thing ṭiak 550 vel an phun a, zirlaite chu leilung leh a chhunga awmte humhalh turin thutiam an sawipui bawk.