Zirlai ruihhlo laka fihlîm lo an tam - Excise Minister

St. Pauls Higher Secondary School chuan nimin khan an auditorium-ah house leader lak luh inkhawm an hmang a, khuallian Lalnghinglova Hmar, Excise & Narcotics minister chuan, Mizorama zirlai zingah ruihhlo laka fihlîm lo an tam thu leh pawi a tih thu a sawi.

Excise Minister chuan, Social Welfare & Tribal Affairs deparment-in kum 2022-a zirchianna a buatsaihah Mizoram chhunga high school leh higher secondary zirlaite zinga 50% chu ruih theih thil leh vaihlo kaihhnawiha fihlîm lo an ni tih hmuh chhuah a nih thu a sawi a, "Mizorama zirlaite zingah ruih theih thila fihlim lo tam tak an awm mek a, a pawi hle," tiin, zirlaite chu ruih theih thil laka fihlim turin a chah.

Minister chuan, Mizo lehkhathiamte'n ngaihtuahna an sên a, sorkar hna, doctor leh engi­neer ringawt nih tum lo a, mahnia eizawnna ngêlnghet neih an tum a pawimawh thu a sawi a, "Zirlai kan nih lai aṭanga tum mumal tak neih a ṭul. Skill development leh entre­preneurship lamah eizawnna kawng tam tak a awm. UPSC civil service exam pek tumte chu pawl 9 an nih aṭanga inbuatsaih ṭan a hun tawh," a ti.

Lalnghinglova Hmar chuan, sikul a luhna ṭhin St. Paul's HSS-a khuallian nia hun a hmang leh thei chu a làwm tak zet thu a sawi bawk.