Parliament-ah neutral a ni dawn - ZPM

ZPM Political Affairs Committee (PAC) member-te ZPM president Lalliansawta hoa nimina ṭhukhawm chuan resolution an siam a; Lok Sabha inthlanpui zawh taka thlan tlin Richard Vanlalhmangaiha'n Parliament-ah zawm bik a nei dawn lo a, a thu azir (issue base)-in a kal dawn thu an tarlang.

ZPM resolution chuan, Lok Sabha MP thar chungchangah, "Campaign laia kan lo sawi tawh ṭhin angin Mizoram MP chuan Parliament-ah zawm bik a nei dawn lo a, neutral a ni ang. A thu azir zelin (issue base-in) a kal dawn a, kan ram tana ṭha ber tur ngaihtuahin party thutlukna ang zelin a kal ang," a ti.

Lok Sabha inthlanpui neih zawk takah ZPM candidate thlan tlin a nih avangin Pathian leh Mizoram mipui chungah ZPM an lawm tak zet tih an tarlang bawk.