Congress party candidate tur Effie Vanlalhmangaihi

Mizoram Pradesh Congress Committee (MPCC) president Lal Thanzara chuan June 25, 2024-a Aizawl Municipal Corporation (AMC) Ward-XIX by-election-a an candidate tur chu Effie Vanlalhmangaihi (48) w/o Saitluanga Sailo, Venghnuai a nih thu nimin khan a puang.

Effie Vanlalhmangaihi hi zirnaah MA (History) a ni a; ZONET Cable TV din tirh aṭanga news reader (chanchin thar puangtu) niin, hun rei tak a thawh hnuah ram leh khawtlang rawngbawl hna thawk turin a chawlhsan.

Venghnuai Local Council member atan vawi hnih thlan tlin a ni tawh a, tunah hian Congress party hmunpuia hmeichhe pawl, Mahila-ah secretary a ni mek.

AMC Ward-XIX hian Kulikawn, Tlangnuam, Tlangnuam Vengthar, Saikhamakawn, Melthum leh Hlimente a huam a; AMC term kal mekah hmeichhe bial niin, kum 2021 inthlanpuia thlan tlin Baryl Vanneihsangi chuan MLA a nih tawh avangin a chhuahsan a, by-election neih a ngai a ni. Congress party bakah hian ZPM leh MNF-te'n an candidate tur an lo puang tawh a ni.