Siaha dist-a pawikhawihna tuartute hnenah zangnadawmna sem a ni

Siaha District Legal Services Authority chuan nimin khan an pisaah pawikhawihna tuartute hnenah zangnadawmna an hlan a, MADC chief executive member (CEM) M Laikaw-a'n a hmanpui.

Zangnadawmna hlanna inkhawm hi Siahaa additional district & session judge leh Fast Track Court judge ni bawk Lalngaihmawia Zote-in a kaihruai a; pawikhawihna tuartu mi eng emaw zat hnenah zangnadawmna Rs 17,80,000 sem a ni.

MADC CEM chuan, Siaha DLSA hnathawh leh hmalakna ropui a tih thu leh fak an phû thu a sawi a, "Siaha district-a pawikhawihna rapthlak tak tuartute lo inenkawlna tur compensation an hmuh theih nana theihtawp in chhuahna a hlawhtling a, cheng nuai 17 chuang kan sem thei hi a ropui ka ti hle," a ti.

M Laikaw chuan, mahni dikna leh chanvo hre lo an la tam tih sawiin, "India Danpui hnuaiah kan dikna leh chanvo phût nachang kan hriat theih nan DLSA hian a tam thei ang berin dan lama hriat zauna tur legal awareness min buatsaihsak a ṭul a ni," a ti a, pawikhawihna tuartute chu DLSA-ah complaint thehlut zel turin a chah.