Sorkar ram chhunga harsatna chinfel dan tur sawiho a ni

Commerce & Industries minister F Rodingliana leh Land Revenue & Settlement minister B Lalchhanzova te kaihhruaiin June 4, Thawhlehni khan Industrial Growth Centre, Luangmual leh Export Promotion Industrial Park, Lengte chhunga harsatnate chinfel dan tur Commerce & Industries leh LRS department hotute'n an sawiho.

F Rodingliana chuan, sorkarin industry din duh tak tak ṭhalaite a ngaih pawimawh thu sawiin, "Industrial area atana puan chhunga dan loa awm mekte chungah khauh zawka dan anga hmalak a ṭul a, industry din nana sorkarin hmun a pekte sorkarin a pek anga hmang lote pawh an plot cancel thlenga hmalak a ṭul dawn," a ti.

LRS minister B Lalchhanzova chuan, department pahnihte inkarah thawhhona ṭha leh ṭanrualna a awm a pawimawh thu a sawi.

Sawihonaah hian industrial area-a VC pass awmte chu dan anga chingfel thuai tura hmalak ni se an ti a; chak zawka hmalak a nih theih nan CI department leh LRS department officer-te telna Joint Task Force din an rel.

ṬHUTKHAWMA TARLANTE

☑ VC-te chu huan atan ram pe theitu an nih loh avangin VC pass-in ram neitu nihna a pek theih loh.

☑ Luangmual LC area chu kum 1971-ah protected area atan puan a nih tawh avangin VC/LC-in ram pek theihna a nei lo.

☑ Dan loa ram lo pek tawhte pawh kum 1972 khan cancel vek a ni tawh.

☑ Industry dinna atana hmun (plot) pek tawh, pek an nih anga hmang lo leh hma la lote chungah Industrial Area (Management, Regulation and Control) Act 2008 anga hmalak a ni dawn.