Kamalanagar HSS-ah zirtirtu dah belh phûtin zirlaite an pungkhawm

Kamalanagar Higher Secondary School, Chawngte-ah zirtirtu dah belh phutin nimin khan zirlaite sikul kawtah an pungkhawm a, zirtirtu an duh belh tih lantirna thuziak hrang hrang an ken bakah, 'Zirtirtu kan duh' tiin an au rual.

Kamalanagar HSS-a zirtirtu an indaih loh chungchangah hian Mizo Students' Union, Chawngte chuan Education leh Economics-ah lecturer an awm loh thu Mizoram sorkarah an thlen tawh a, an thu thlente tihhlawhtlin a nih loh chuan sikul kai tur dan an tum thu an puang. Mahse, School Education Minister aṭangin chhanna lawm­awm an dawn avangin June 4, 2024 aṭanga sikul kai tur dan an tum chu an ṭhulh a ni.

Hetih lai hian, Kamala­nagar HSS zirlaite chu nimin zing khan an sikul kawtah an pungkhawm a; MSU hruaitute'n Mizoram sorkar nena an indawr dan hrilh­fiahin, June 2024 chhung ngeia zirtirtu dah belh tura School Education Minister-in a hrilh thu an sawi hnuah pun­khawm chu an titawp a ni.

Thu dawn danin, Kamala­nagar HSS-ah hian lecturer 14 awm tura ngaih a nih laiin panga chauh an awm mek a, September 2024 aṭang khan Economics leh Education subject-ah lecturer an nei lo tawh a ni.